ശിവഗിരി: ശ്രീനാരായണഗുരുദേവൻ ശിവഗിരിയിൽ ശാരദാദേവിയെ പ്രതിഷ്ഠിച്ചതിന്റെ 110-ാമത് വാർഷികവും 60-ാമത് ശ്രീനാരായണ ധർമ്മമീമാംസാ പരിഷത്തും 16, 17, 18 തീയതികളിൽ ശിവഗിരിമഠത്തിൽ നടക്കും. 16ന് രാവിലെ 7.30ന് ശ്രീനാരായണ ധർമ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ പതാക ഉയർത്തും. 9.30ന് ഉദ്ഘാടന സമ്മേളനത്തിൽ ധർമ്മസംഘം ട്രസ്റ്റ് ബോർഡംഗം സ്വാമി ബോധിതീർത്ഥ ദീപം തെളിക്കും. പ്രതിപക്ഷ നേതാവ് വി.ഡി.സതീശൻ പരിഷത്ത് ഉദ്ഘാടനം ചെയ്യും. സ്വാമി സച്ചിദാനന്ദ അദ്ധ്യക്ഷത വഹിക്കും. അഡ്വ. വി.ജോയി എം.എൽ.എ, നഗരസഭ ചെയർമാൻ കെ.എം.ലാജി, ധർമ്മസംഘം ട്രസ്റ്റ് ജനറൽ സെക്രട്ടറി സ്വാമി ഋതംഭരാനന്ദ, ട്രഷറർ സ്വാമി ശാരദാനന്ദ, ബോർഡംഗം സ്വാമി വിശാലാനന്ദ, ഗുരുധർമ്മ പ്രചരണസഭാ സെക്രട്ടറി സ്വാമി ഗുരുപ്രസാദ് എന്നിവർ പ്രഭാഷണങ്ങൾ നടത്തും. 11.30ന് ശാരദാമഠത്തിൽ പ്രതിഷ്ഠാവാർഷികത്തിന്റെ ഭാഗമായി വിശേഷാൽ ചടങ്ങുകൾ നടക്കും. 18 വരെ ക്ലാസുകളും സെമിനാറുകളും നടക്കും.
ശിവഗിരിയിൽ വിഷുദർശനവും വിഷുക്കൈനീട്ടവും
ശിവഗിരി: വിഷു പ്രമാണിച്ച് 15ന് ശിവഗിരിയിൽ വിഷുക്കണി ദർശനവും വിഷുക്കൈനീട്ടവും ഉണ്ടായിരിക്കും. മഹാസമാധി പീഠത്തിലെ ഗുരുദേവ വിഗ്രഹത്തിന് മുമ്പിൽ ഒരുക്കുന്ന വിഷുക്കണി പ്രഭാതപൂജയോടെ രാവിലെ 5.30ന് ഭക്തജനങ്ങൾക്ക് ദർശിക്കാം. സമൂഹപ്രാർത്ഥന, ഗുരുപൂജ എന്നിവയ്ക്കു ശേഷം ധർമ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ ഭക്തജനങ്ങൾക്ക് വിഷുക്കൈനീട്ടം നൽകും. 10ന് നടക്കുന്ന ശ്രീനാരായണ ദിവ്യസത്സംഗത്തിൽ സ്വാമി ഋതംഭരാനന്ദ, സ്വാമി ശാരദാനന്ദ തുടങ്ങിയവർ പ്രഭാഷണങ്ങൾ നടത്തും. ഭക്തജനങ്ങൾ ഗുരുദേവചിത്രം സമാലംകൃതമായി വിഷുക്കണി ദർശനം ഒരുക്കണമെന്നും വിഷുക്കൈനീട്ടം നൽകി വീടുകളിലും ആരാധനാലയങ്ങളിലും ഗുരുദേവ സ്മരണയോടെ വിഷുആഘോഷം നടത്തണമെന്നും ഗുരുശിഷ്യ പാരമ്പര്യം ഊട്ടിയുറപ്പിക്കുന്ന പുണ്യദിനമായി വിഷുദിനം മാറണമെന്നും സ്വാമി സച്ചിദാനന്ദ അറിയിച്ചു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |