തളിപ്പറമ്പ്: ഒന്നാം വർഷ ഡിഗ്രി, പിജി പ്രവേശന നടപടികൾ നിറുത്തിവച്ച കണ്ണൂർ സർവ്വകലാശാല നടപടി പുനഃപരിശോധിക്കണമെന്നാവശ്യപ്പെട്ട് പാരലൽ കോളേജ് അസോസിയേഷന്റെ നേതൃത്വത്തിൽ ഒരു ലക്ഷം വിദ്യാർത്ഥികൾ ഒപ്പിട്ട ഭീമ ഹർജി നൽകും. കേരളത്തിലെ എല്ലാ സർവ്വകലാശാലകളിലും പ്രവേശന നടപടികൾ പൂർത്തിയായ സാഹചര്യത്തിൽ ഗവർണ്ണർ, മുഖ്യമന്ത്രി, പ്രതിപക്ഷ നേതാവ് എന്നിവർ ഈ വിഷയത്തിൽ അടിയന്തരമായി ഇടപെടണമെന്ന് ആവശ്യപ്പെട്ടാണ് ഹർജി നൽകുന്നതെന്ന് കണ്ണൂർ, കാസർഗോഡ്, വയനാട് ഏരിയ കമ്മറ്റി ചെയർമാൻ കെ.എൻ രാധാകൃഷ്ണൻ പറഞ്ഞു. തളിപ്പറമ്പ് നാഷണൽ കോളേജിൽ നടന്ന ചടങ്ങിൽ പി.കെ.ബി ജോയ്, എൻ.വി പ്രസാദ്, ടി.കെ വിജയൻ, സി. രഘു,​ കെ.വി. സുരേഷ്, പി. പ്രദീപൻ, എ.റിസാന, പി. നിഹാല, കെ. ജാസ്മിന, ഇസ്സത്ത് ജഹാൻ പങ്കെടുത്തു.