ന്യൂഡൽഹി: രണ്ട്​ പൊതുമേഖലാ ബാങ്കുകൾ കൂടി സ്വകാര്യവൽക്കരിക്കാനൊരുങ്ങി കേന്ദ്രസർക്കാർ. സെൻട്രൽ ബാങ്ക്​ ഒഫ്​ ഇന്ത്യ, ഇന്ത്യൻ ഓവർസീസ്​ ബാങ്ക്​ എന്നിവയുടെ സ്വകാര്യവൽക്കരണമാണ്​ ഈ വർഷം നടക്കുക. നീതി ആയോഗാണ്​ സ്വകാര്യവൽക്കരിക്കേണ്ട ബാങ്കുകളുടെ ഷോർട്ട്​ ലിസ്​റ്റ്​ തയാറാക്കിയത്​. ടൈംസ്​ ഒഫ്​ ഇന്ത്യയാണ്​ റിപ്പോർട്ട്​ പുറത്ത്​ വിട്ടത്​.

ബാങ്ക്​ ഒഫ്​ ഇന്ത്യയും ലിസ്​റ്റിൽ ഉൾപ്പെട്ടിട്ടുണ്ടെന്ന വാർത്തകളും പുറത്ത്​ വരുന്നുണ്ട്​. പൊതുമേഖല കമ്പനികളുടെ ഓഹരി വിൽപനയുമായി ബന്ധപ്പെട്ട സമിതിക്കാണ്​ നീതി ആയോഗ്​ ബാങ്കുകളുടെ പട്ടിക കൈമാറിയത്​. ഇതിനൊപ്പം ഒരു ഇൻഷ്വറൻസ്​ കമ്പനിയുടെ പേരും നൽകിയിട്ടുണ്ട്​. ഈ സാമ്പത്തിക വർഷം തന്നെ ബാങ്കുകളുടേയും ഇൻഷ്വറൻസ്​ കമ്പനിയുടേയും സ്വകാര്യവൽക്കരണം ഉണ്ടാവും. സെൻട്രൽ ബാങ്ക് ഒഫ് ഇന്ത്യയിൽ 30,000 പേരും ഇന്ത്യൻ ഓവർസീസ് ബാങ്കിൽ 26,000പേരും ജീവനക്കാരായുള്ളത്.

പൊതുമേഖല കമ്പനികളുടെ ഓഹരി വിൽപനയിലൂടെ ഈ വർഷം 1.75 ലക്ഷം കോടി സ്വരൂപിക്കാനാണ്​ കേന്ദ്രസർക്കാർ ലക്ഷ്യമിടുന്നത്​. എയർ ഇന്ത്യ, ബി.പി.സി.എൽ, ഷിപ്പിംഗ് കോർപ്പറേഷൻ എന്നിവയുടെ ഓഹരിയും ഈ വർഷം വിൽക്കും.

 ലക്ഷ്യം 1.75 ലക്ഷം കോടി