ന്യൂഡൽഹി: കൊവിഡ്​ രണ്ടാം തരംഗം മൂലം സമ്പദ്​വ്യവസ്ഥയിൽ രണ്ട്​ ലക്ഷം കോടിയുടെ നഷ്​ടമുണ്ടായെന്ന്​ ആർ.ബി.ഐ. ജൂണിൽ പുറത്തിറക്കിയ പ്രതിമാസ ബുള്ളറ്റിനിലാണ്​ ആർ.ബി.ഐ ഇക്കാര്യം വ്യക്​തമാക്കിയത്​. വൈറസിനെ പ്രതിരോധിക്കാൻ ചെറു നഗരങ്ങളിലും ഗ്രാമങ്ങളിലും ഏർപ്പെടുത്തിയ നിയന്ത്രണങ്ങൾ സമ്പദ്​വ്യവസ്ഥയെ പ്രതികൂലമായി ബാധിച്ചുവെന്ന്​ ആർ.ബി.ഐ പറയുന്നു.

ഇന്ത്യൻ സമ്പദ്​വ്യവസ്ഥ കൊവിഡ്​ രണ്ടാം തരംഗത്തോടുള്ള പോരാട്ടം തുടരുകയാണെങ്കിലും ചെറിയ പുരോഗതി ദൃശ്യമാണെന്നും ആർ.ബി.ഐ റിപ്പോർട്ടിൽ വ്യക്​തമാക്കി. ആഭ്യന്തര ഉപഭോഗത്തെ കൊവിഡ്​ രണ്ടാം തരംഗം ഗുരുതരമായി ബാധിച്ചുവെന്നും ആർ.ബി.ഐ പറയുന്നു. കൃഷിയും ചില സേവനങ്ങളും മാത്രമാണ്​ ഇക്കാലയളവിൽ കാര്യമായി പ്രവർത്തിച്ചതെന്നും ആർ.ബി.ഐ അറിയിച്ചു. വ്യാവസായിക ഉത്പാദനത്തേയും കയറ്റുമതിയേയും കൊവിഡ്​ രണ്ടാം തരംഗം ഗുരുതരമായി ബാധിച്ചു. ഇനി വാക്​സിനേഷൻ വേഗതയായിരിക്കും സമ്പദ്​വ്യവസ്ഥയുടെ തിരിച്ചു വരവിന്റെ വേഗം നിശ്​ചയിക്കുകയെന്നും ആർ.ബി.ഐ വ്യക്തമാക്കി.