യു.ഡി.എഫ് കൺവീനറുമായി സംഭാഷണം, രാഹുൽപ്പേടിയില്ല,​ ഫലം വരുമ്പോൾ ഞെട്ടും!

അങ്കം ഒരുപാട് കണ്ട നേതാവാണ് അടൂർ പ്രകാശ്. ആ അനുഭവ പരിചയവും പോരാട്ടവീര്യവുമാണ് പ്രതിസന്ധി ഘട്ടത്തിൽ മുന്നണിയെ നയിക്കുകയെന്ന ഉത്തരവാദിത്വത്തോടെ യു.ഡി.എഫ് കൺവീനർ സ്ഥാനം അദ്ദേഹത്തെ ഏല്പിക്കാൻ കോൺഗ്രസിനെ പ്രേരിപ്പിച്ചത്. നടക്കാനിരിക്കുന്നത് തദ്ദേശ സ്വയംഭരണ തിരഞ്ഞെടുപ്പ്; വൈകാതെ വരാനിരിക്കുന്നത് നിർണായകമായ നിയമസഭാ തിരഞ്ഞെടുപ്പ്... തിരക്കിനിടയിൽ 'കേരളകൗമുദി"യുമായി സംഭാഷണം.

?​ തിരഞ്ഞെടുപ്പ് പടിവാതിലിൽ നിൽക്കുമ്പോൾ പണി പാളിയോ...

 രാഹുൽ മാങ്കൂട്ടത്തിലിനെ ലക്ഷ്യം വച്ചാണ് ചോദ്യമെന്ന് മനസിലായി. കേരളത്തിൽ ഇന്ന് രാഹുൽ ഒരു വിഷയമല്ല. ഒരു ഇരയെ കിട്ടിയ സന്തോഷത്തിൽ സി.പി.എം അത് ആഘോഷമാക്കുന്നുണ്ട്. എന്നാൽ ജനത്തിന് കോൺഗ്രസിനെയും കേരളത്തിലെ യു.ഡി.എഫിനെയും അറിയാം. റിസൾട്ട് വരുമ്പോൾ വാങ്ങിവച്ച അവരുടെ പടക്കങ്ങളെല്ലാം നനഞ്ഞു പോകും.

?​ രാഹുൽ മാങ്കൂട്ടത്തിലിനെ പുറത്താക്കി എന്നു പറയുമ്പോഴും പ്രചാരണരംഗത്ത് സജീവമായിരുന്നല്ലോ!

 കേരളത്തിൽ തദ്ദേശ സ്വയംഭരണ തിരഞ്ഞെടുപ്പ് പ്രഖ്യാപിച്ചപ്പോൾ എല്ലാ നേതാക്കൾക്കും പാർട്ടിയും മുന്നണിയും ചുമതലകൾ വീതിച്ചു നൽകിയിട്ടുണ്ട്. അതുപ്രകാരമാണ് നേതാക്കളെല്ലാം വിവിധ ജില്ലകളിലായി പരിപാടികളിലും തിരഞ്ഞെടുപ്പ് പ്രവർത്തനങ്ങളിലും ഏർപ്പെടുന്നത്. അതിൽ രാഹുലിന്റെ പേരില്ല. പിന്നെ എന്തിന് പ്രചാരണത്തിന് പോയി എന്നതാണ് ചോദ്യം. അദ്ദേഹം പാലക്കാട്ടെ എം.എൽ.എ ആണ്. സ്വാഭാവികമായും അദ്ദേഹത്തെ വിജയിപ്പിച്ചവർ വിളിച്ചപ്പോൾ പോയിട്ടുണ്ടാവും. അത് വേണ്ടെന്നു പറയാനാവില്ലല്ലോ. കേസ് കേസിന്റെ വഴിക്ക് പോകട്ടെ. അതെല്ലാം അദ്ദേഹം നേരിടും. ജനങ്ങളുടെ കോടതിയിൽ പാർട്ടിയും.

?​ സി.പി.എമ്മിന്റെ ഗൂഢാലോചന എന്ന് താങ്കൾ പറയുമ്പോൾ പെൺകുട്ടിയെ മുഖ്യമന്ത്രിക്കു മുന്നിലെത്തിച്ചത് രാഹുലാണെന്ന് പ്രമുഖ നേതാക്കൾ പറയുന്നുണ്ട്...

 യു.ഡി.എഫ് കൺവീനർ എന്ന നിലയിലാണ് ഞാൻ എന്റെ അഭിപ്രായം പറയുന്നത്. മറ്റ് നേതാക്കൾ എന്തു പറഞ്ഞു എന്നത് പാർട്ടി വേദിയിൽ പരിശോധിക്കും. ഇത്രയും കാലം സംഭവിക്കാത്ത പരാതി പെട്ടെന്ന് മുഖ്യമന്ത്രിക്കു മുന്നിലെത്തിയതിനു പിന്നിൽ സി.പി.എമ്മിന്റെ രാഷ്ട്രീയ ഗൂഢാലോചനയാണെന്ന് ഉറപ്പിച്ചു പറയുന്നു. എല്ലാ തിരഞ്ഞെടുപ്പുകാലത്തും എതിരാളികളെ തോല്പിക്കാൻ സി.പി.എം ഇരകളെ തേടാറുണ്ട്. അതാണ് ഇപ്പോഴും സംഭവിച്ചത്. ഞാൻ മത്സരിച്ച കാലത്തൊക്കെ എന്തെല്ലാം വേട്ടയാടലുകളുണ്ടായി! ഉമ്മൻചാണ്ടിയെ എങ്ങനെയെല്ലാം വേട്ടയാടി... എല്ലാം നിങ്ങൾക്ക് അറിയാമല്ലോ. അത്തരം ആരോപണങ്ങളൊക്കെ ഇപ്പോൾ എവിടെയാണ്?​

?​ രാഹുലിനെ ഒളിപ്പിച്ചത് പാർട്ടി കേന്ദ്രത്തിലാണോ.

 രാഹുലിനെ സംരക്ഷിക്കാൻ ഇത്രയുംകാലം കോൺഗ്രസ് ഇടപെട്ടിട്ടില്ല. മറ്റൊരു പാർട്ടിയും കാണിക്കാത്ത നിലപാട് രാഹുലിന്റെ കാര്യത്തിൽ കോൺഗ്രസ് എടുത്തു. എല്ലാ പാർട്ടി സ്ഥാനങ്ങളിൽ നിന്നും മാറ്റിനിറുത്തി. ശബരിമല കൊള്ളയിൽ നേതാക്കളെല്ലാം അകത്തുപോകുന്നതിന്റെ വിഭ്രാന്തിയിൽ ജനങ്ങളുടെ കണ്ണിൽ പൊടിയിടാനുള്ള ശ്രമത്തിന്റെ ഭാഗമാണിത്. അയ്യപ്പന്റെ കട്ടിളപ്പാളിവരെ അടർത്തിക്കൊണ്ടുപോയി വെട്ടിലായവർക്ക് രക്ഷപ്പെടാൻ ഒരു കച്ചിത്തുരുമ്പെങ്കിലും വേണ്ടേ?​ പക്ഷെ,​ അതൊന്നും ജനങ്ങൾക്കിടയിൽ ഏശില്ല.

?​ എന്താണ് തിരഞ്ഞെടുപ്പ് പ്രതീക്ഷ.

 ഒരു സംശയവും വേണ്ട. കോർപ്പറേഷനിൽ കണ്ണൂർ നിലനിറുത്തുക മാത്രമല്ല,​ മറ്റ് കോർപ്പറേഷനുകളും പിടിക്കും. പഞ്ചായത്തുകളിൽ ഭൂരിപക്ഷവും പിന്നെ ബ്ലോക്കുകളും ജില്ലാ പഞ്ചായത്തുകളും നഗരസഭകളും യു.ഡി.എഫിലേക്ക് വരും. ആരോപണങ്ങളിൽ തളർത്താനാവുന്ന പ്രസ്ഥാനമല്ല കോൺഗ്രസും യു.ഡി.എഫും. കഴിഞ്ഞ പത്തുവർഷത്തെ ഇടതുഭരണത്തിൽ കേരളത്തിൽ നടന്നതെന്താണെന്ന് അറിയുന്നവരാണ് ഇവിടത്തെ ജനങ്ങൾ. വോട്ടിലൂടെ അവർ മറുപടി പറയും.