ഗൃഹനാഥനെ ചുറ്റിക കൊണ്ട് തലയ്‌ക്കടിച്ചു ; യുവാവ് അറസ്റ്റിൽ

വിഴിഞ്ഞം: കുടുംബപ്രശ്‌നത്തെ തുടർന്നുള്ള വാക്കുതർക്കത്തിനിടെ ഗൃഹനാഥനെ ചുറ്റിക കൊണ്ട് തലയ്‌ക്കടിച്ചയാളെ വിഴിഞ്ഞം പൊലീസ് പിടികൂടി. കഴിഞ്ഞ ദിവസം രാത്രി വിഴിഞ്ഞം ഉച്ചക്കട വട്ടവിള സ്വദേശി ബാബു എന്ന ജയസിംഗിനെ (47) വീടുകയറി ആക്രമിച്ച സംഭവത്തിൽ

ബന്ധുവായ ഉച്ചക്കട വട്ടവിള സ്വദേശി മിഥുനാണ് (25) അറസ്റ്റിലായത്.

തലയ്‌ക്ക് ഗുരുതര പരിക്കേറ്റ ജയസിങ് മെഡിക്കൽ കോളേജ് ആശുപത്രിയിൽ അത്യാഹിത വിഭാഗത്തിൽ ചികിത്സയിലാണ്. സംഘർഷത്തിൽ മിഥുനും തലയ്‌ക്ക് പരിക്കുണ്ട്. താക്കോൽ കൂട്ടം ഉപയോഗിച്ചും പരിക്കേല്പിച്ചതായി വിഴിഞ്ഞം എസ്.എച്ച് ഒ പ്രജീഷ് ശശി പറഞ്ഞു. സംഭവമറിഞ്ഞെത്തിയ വിഴിഞ്ഞം പൊലീസ് ഇരുവരെയും ആശുപ്രതിയിലെത്തിച്ചു. ഇയാൾക്കെതിരെ വധശ്രമത്തിന് കേസെടുത്തതായി പൊലീസ് വ്യക്തമാക്കി.