ക്ലിക്ക് ചെയ്യരുത് കെണിയില്‍ വീഴരുത്; പണം തട്ടാന്‍ പുതിയ തട്ടിപ്പ് ഇ-ചെല്ലാനിലും

തിരുവനന്തപുരം: ഓണ്‍ലൈന്‍ സാമ്പത്തിക തട്ടിപ്പിന്റെ ഏറ്റവും പുതിയ രൂപം മോട്ടോര്‍ വാഹന വകുപ്പിന്റെ പേരില്‍. വാട്‌സാപ്പ് വഴിയാണ് തട്ടിപ്പ് നടത്തി പണം തട്ടിയെടുക്കുന്നത്. നിങ്ങളുടെ പേരിലുള്ള വാഹനത്തിന് പിഴ ചുമത്തിയെന്ന് കാണിച്ച് വിശദാംശങ്ങള്‍ ഉള്‍പ്പെടുത്തി വാട്‌സാപ്പില്‍ സന്ദേശമെത്തും. മറ്റ് നിയമനടപടികള്‍ സ്വീകരിക്കാതിരിക്കാന്‍ ഇതിനോടൊപ്പമുള്ള ആപ്പ് ലിങ്ക് ക്ലിക്ക് ചെയ്ത് ഡൗണ്‍ലോഡ് ചെയ്ത് പണം അടയ്ക്കുകയെന്നതാണ് നിര്‍ദേശമായി എത്തുക.

ആപ്പ് ഡൗണ്‍ലോഡ് ചെയ്ത് ഇന്‍സ്റ്റാള്‍ ചെയ്താല്‍ നിങ്ങളുടെ അക്കൗണ്ടില്‍ നിന്ന് പണം പോകുമെന്നുറപ്പാണ്. സംസ്ഥാനത്ത് വിവിധ ജില്ലകളിലായി നിരവധി പേരാണ് പണം നഷ്ടപ്പെട്ടുവെന്ന് കാണിച്ച് പരാതിയുമായി പൊലീസിനെ സമീപിച്ചിരിക്കുന്നത്. തട്ടിപ്പ് വ്യാപകമായതോടെ മുന്നറിയിപ്പുമായി രംഗത്ത് വന്നിരിക്കുകയാണ് മോട്ടോര്‍ വാഹന വകുപ്പ്. എംപരിവാഹന്‍ എന്ന പേരില്‍ ഒരു എപികെ അറ്റാച്ച്‌മെന്റ് ചേര്‍ന്ന് മലയാളത്തിലും സന്ദേശം വരുന്നുണ്ട്. ഇത് ഒരുകാരണവശാലും ഡൗണ്‍ലോഡ് ചെയ്യരുതെന്നാണ് നിര്‍ദേശം.

എംവിഡി കേരള ഫേസ്ബുക്ക് പേജില്‍ പങ്കുവച്ച കുറിപ്പ്

വ്യാജനാണ് പെട്ടു പോകല്ലെ.
Traffic violation notice എന്ന പേരില്‍ പലരുടെയും വാട്‌സ് ആപ്പ് നമ്പരിലേക്ക് മലയാളത്തില്‍ താഴെ പറയുന്ന ഒരു മെസേജും mParivahan എന്ന ഒരു APK ഫയലും വരുന്നതായി പരാതി ഉയരുന്നുണ്ട്.
നേരത്തെ ഇത്തരം വ്യാജസന്ദേശങ്ങളും കെണികളും ഇംഗ്ലീഷിലായിരുന്നു. കഴിഞ്ഞ ദിവസങ്ങളിലാണ് മലയാളത്തിലും വന്ന് തുടങ്ങിയിട്ടുള്ളത്.
ഇത് വ്യാജനാണ്. നിങ്ങള്‍ ആ ഫയല്‍ ഓപ്പണ്‍ ചെയ്താല്‍ നിങ്ങളുടെ ഫോണിലുളള പ്രധാനപ്പെട്ട വിവരങ്ങള്‍, ബാങ്ക് Details,പാസ് വേര്‍ഡുകള്‍ തുടങ്ങിയവ ഹാക്കര്‍മാര്‍ കൈക്കലാക്കാന്‍ സാധ്യത ഉണ്ട്. ആയതിനാല്‍ ഒരു കാരണവശാലും APK ഫയല്‍ ഓപ്പണ്‍ ചെയ്യരുത്.
മോട്ടോര്‍ വാഹന വകുപ്പോ, പോലിസോ സാധാരണയായി വാട്ട്‌സ് അപ്പ് നമ്പറിലേക്ക് നിലവില്‍ ചലാന്‍ വിവരങ്ങള്‍ അയക്കാറില്ല. അത്തരം വിവരങ്ങള്‍ നിങ്ങളുടെ ആര്‍ സി യില്‍ നിലവിലുള്ള മൊബൈല്‍ നമ്പറിലേക്ക് ടെക്സ്റ്റ് മെസേജ് ആയാണ് ഇ ചലാന്‍ സൈറ്റ് വഴി അയക്കാറുള്ളത്.
ഏതെങ്കിലും സാഹചര്യത്തില്‍ ഇത്തരം മെസേജുകള്‍ വന്നാല്‍ https://echallan.parivahan.gov.in എന്ന സൈറ്റില്‍ കയറി Check Pending transaction എന്ന മെനുവില്‍ നിങ്ങളുടെ വാഹന നമ്പറോ,ചലാന്‍ നമ്പറോ നല്‍കിയാല്‍ നിങ്ങളുടെ വാഹനത്തിന് ഏതെങ്കിലും ചലാന്‍ പെന്റിങ്ങ് ഉണ്ടോ എന്ന് അറിയാവുന്നതാണ്.
ഏതെങ്കിലും തരത്തില്‍ പണം നഷ്ടപ്പെട്ടാല്‍ ഉടനടി 1930 എന്ന നമ്പറിലേക്ക് ബന്ധപ്പെടുക.