അഞ്ചുവയസുകാരനെ അമ്മയും അമ്മൂമ്മയും ഉപദ്രവിച്ചത് അതിക്രൂരമായി, മുറിവുകൾ മുഖത്തും കഴുത്തിലും

ആലപ്പുഴ: ചേർത്തലയിൽ യുകെജി വിദ്യാർത്ഥിയായ അഞ്ചുവയസുകാരനെ മർദ്ദിച്ചെന്ന പരാതിയിൽ അമ്മയ്ക്കും അമ്മൂമ്മയ്ക്കും എതിരെ കേസെടുത്തു. അമ്മ സ്‌കെയിലുകൊണ്ട് അടിച്ചതാണെന്നും അമ്മൂമ്മയും ഉപദ്രവിക്കാറുണ്ടെന്നും കുട്ടി പറയുന്നു. കുട്ടിയുടെ മൊഴിയുടെ അടിസ്ഥാനത്തിൽ ചൈൽഡ് ലൈൻ പ്രവർത്തകർ ഇടപെടുകയായിരുന്നു. മുഖത്തും കഴുത്തിനും മുറിവേ​റ്റ നിലയിൽ ചായക്കടയിലാണ് കുട്ടിയെ കണ്ടെത്തിയത്. ചായക്കടയിൽ കുട്ടിയെ ഇരുത്തിയ ശേഷമാണ് അമ്മ ലോട്ടറിവിൽപ്പനയ്ക്ക് പോകുന്നത്.

പിടിഎ പ്രസിഡന്റ് അഡ്വ ദിനൂപിന്റെ ശ്രദ്ധയിൽ പെട്ടതോടെയാണ് വിവരം പുറത്തറിഞ്ഞത്. തുടർന്നാണ് കേസ് നൽകിയതെന്നാണ് റിപ്പോർട്ട്. കുട്ടിയെ രാത്രിതന്നെ ശിശുക്ഷേമ സമിതി ഏ​റ്റെടുത്തു. ഇക്കഴിഞ്ഞ മേയ് 24ന് അമ്മയുടെ ആൺ സുഹൃത്ത് കുട്ടിയെ ഉപദ്രവിച്ച കേസിൽ അറസ്റ്റിലായിരുന്നു. പിന്നീട് ഇയാൾ മരിച്ചിരുന്നു. കുട്ടിക്ക് പരിക്കേറ്റ സംഭവത്തെക്കുറിച്ച് കൂടുതൽ അന്വേഷണമുണ്ടാകുമെന്നാണ് പൊലീസ് നൽകുന്ന സൂചന.