വിമാനത്താവളത്തിൽ 1.20 കോടിയുടെ സ്വർണം പിടികൂടി

നെടുമ്പാശേരി: കൊച്ചി രാജ്യാന്തര വിമാനത്താവളത്തിൽ രണ്ട് യാത്രക്കാരിൽ നിന്നായി 1.20 കോടി രൂപയുടെ സ്വർണം പിടികൂടി. ഒമാൻ എയർ വിമാനത്തിൽ ദുബായിൽ നിന്ന് മസ്‌ക്കറ്റ് വഴിയെത്തിയ കോഴിക്കോട് സ്വദേശി അബ്ദുൾ റസാഖ്, ബഹ്‌റൈനിൽ നിന്നെത്തിയ കോഴിക്കോട് സ്വദേശി മുഹമ്മദ് സാല എന്നിവരിൽ നിന്നാണ് 2.451 കിലോ സ്വർണം പിടികൂടിയത്.

രണ്ട് പേരും ധരിച്ചിരുന്ന ജീൻസിൽ പ്രത്യേകം അറയുണ്ടാക്കി അതിനകത്താണ് സ്വർണം മിശ്രിതം ഒളിപ്പിച്ചിരുന്നത്. അബ്ദുൾ റസാഖിന്റെ പക്കൽ 829 ഗ്രാം സ്വർണമിശ്രിതവും 246 ഗ്രാം തൂക്കം വരുന്ന രണ്ട് സ്വർണവാച്ചുമാണ് ഉണ്ടായിരുന്നത്. മുഹമ്മദ് സാലയുടെ പക്കൽ നിന്ന് 1.366 കിലോ സ്വർണ മിശ്രിതമാണ് പിടികൂടിയത്.