മൊബൈൽ ഫോൺ നിങ്ങളുടെ ശരീരത്തെ മാറ്റിമറിക്കും; തനിക്ക് സംഭവിച്ചതിനെക്കുറിച്ച് മാധവൻ

ഇന്നത്തെക്കാലത്ത് സ്വന്തമായൊരു മൊബൈൽ ഫോണില്ലാത്തവർ വളരെ ചുരുക്കമായിരിക്കും. ഒരു അഞ്ച് മിനിട്ട് കിട്ടിയാൽ കണ്ണ് ഫോണിലേക്ക് പോകും. റീലുകളും മറ്റും കണ്ട് സമയം പോകുന്നതുപോലും അറിയുകയില്ല. ഫോണില്ലാതെ കുറച്ചുനേരം ഇരിക്കാൻ പോലും പലർക്കും സാധിക്കില്ല. എന്നാൽ അടുത്തിടെ ഒരു സെമിനാറിൽ മൊബൈൽ ഫോൺ ഉപയോഗത്തിന്റെ ദൂഷ്യഫലങ്ങളെക്കുറിച്ച് സംസാരിച്ചിരിക്കുകയാണ് നടൻ ആർ മാധവൻ.

'നിങ്ങളുടെ കൈ ഉയർത്തിപ്പിടിക്കാൻ ഞാൻ ആവശ്യപ്പെടുന്നു. നിങ്ങൾ ഫോൺ ഉപയോഗിക്കാത്ത കൈയിലെ വിരലുകൾ വാരിയെല്ലിന് മുകളിലൂടെ ഓടിക്കുക. വിരലിൽ എന്തെങ്കിലും കുഴപ്പമുണ്ടോ? തുടർന്ന് നിങ്ങൾ ഫോൺ ഉപയോഗിക്കുന്ന കൈ കൊണ്ടും അങ്ങനെ ചെയ്യുക. വ്യത്യാസം മനസിലാകും. ഞാൻ നിങ്ങളോട് പറയുന്നു. നമുക്കെല്ലാവർക്കും മൊബൈൽ ഫോൺ ഫിംഗേഴ്സ് ഉണ്ട്.' - നടൻ പറഞ്ഞു.

ഫോൺ കാരണം നിങ്ങളുടെ ശരീരം മാറിമറിഞ്ഞുകൊണ്ടിരിക്കുകയാണെന്നും അദ്ദേഹം പറഞ്ഞു. നിങ്ങളുടെ ഫോൺ കാരണം നിങ്ങളുടെ ശരീരം മാറിമറിയുകയാണ്. മൊബൈൽ ഫോൺ ദീർഘനേരം ഉപയോഗിക്കുന്നത് മൂലമുണ്ടാകുന്ന ക്ഷീണം അല്ലെങ്കിൽ അസ്വസ്ഥതയെയാണ് മൊബൈൽ ഫോൺ ഫിംഗേഴ്സ് എന്ന് പറയുന്നത്.

ഫോൺ ദീർഘനേരം ഉപയോഗിക്കുന്നത് വിരലുകളിലും മറ്റും വേദനയുണ്ടാക്കുന്നു. സ്‌ക്രോൾ ചെയ്യുക, ടൈപ്പ് ചെയ്യുക, ദീർഘനേരം ഫോൺ പിടിക്കുക തുടങ്ങിയ ആവർത്തിച്ചുള്ള ചലനങ്ങളിൽ നിന്നാണ് പലപ്പോഴും ഈ അസ്വസ്ഥത ഉണ്ടാകുന്നത്.