സ്‌കൂൾ മതിലിലേയ്ക്ക് കാർ ഇടിച്ചുകയറി അപകടം, മൂന്ന് വയസുകാരന് ദാരുണാന്ത്യം

കോട്ടയം: നിയന്ത്രണം വിട്ട കാർ മതിലിൽ ഇടിച്ചുകയറിയുണ്ടായ അപകടത്തിൽ മൂന്ന് വയസുകാരന് ദാരുണാന്ത്യം. കോട്ടയം പാമ്പാടിയിലാണ് അപകടമുണ്ടായത്. ഡൽഹിയിൽ സ്ഥിരതാമസമാക്കിയ മല്ലപ്പള്ളി സ്വദേശികളായ ടിനു-മെറിൻ ദമ്പതികളുടെ മകൻ കീത്ത് തോമസാണ് മരിച്ചത്. മെറിന്റെ സഹോദരിയുടെ കുഞ്ഞിന്റെ മാമോദീസാ ചടങ്ങിൽ പങ്കെടുത്ത് മടങ്ങവേയായിരുന്നു അപകടം. കുറ്റിക്കൽ സെന്റ് തോമസ് സ്‌കൂളിന്റെ മതിലിലേക്കാണ് കാർ ഇടിച്ചുകയറിയത്.

രണ്ട് കുട്ടികളടക്കം ഏഴുപേരാണ് കാറിലുണ്ടായിരുന്നത്. അപകട കാരണം വ്യക്തമല്ല. അപകടത്തിന് പിന്നാലെ കുഞ്ഞ് സീറ്റിനടിയിലേയ്ക്ക് വീണുപോവുകയായിരുന്നു. കാറിലുണ്ടായിരുന്ന ടിനു, മെറിൻ, മാത്യു, ശോശാമ്മ, ലൈസമ്മ, കിയാൻ എന്നിവർക്ക് പരിക്കേറ്റു. കുഞ്ഞിന്റെ മൃതദേഹം തെള്ളകത്തെ സ്വകാര്യ ആശുപത്രിയിൽ സൂക്ഷിച്ചിരിക്കുകയാണ്. പരിക്കേറ്റവരെ പാമ്പാടി താലൂക്ക് ആശുപത്രിയിൽ പ്രവേശിപ്പിച്ചു.