നിലമേലിൽ സ്‌കൂൾ ബസ് നിയന്ത്രണം വിട്ട് താഴ്‌ചയിലേക്ക് മറിഞ്ഞു, 22 വിദ്യാർത്ഥികൾക്ക് പരിക്ക്

തിരുവനന്തപുരം: നിലമേൽ വേക്കലിൽ സ്‌കൂൾ ബസ് മറിഞ്ഞുണ്ടായ അപകടത്തിൽ 22 വിദ്യാർത്ഥികൾക്ക് പരിക്ക്. കിളിമാനൂർ പാപ്പാല വിദ്യാജ്യോതി എൽപി സ്‌കൂളിലെ ബസാണ് മറിഞ്ഞത്. പരിക്കേ​റ്റ വിദ്യാർത്ഥികളെ കടയ്ക്കൽ താലൂക്ക് ആശുപത്രിയിലും പാരിപ്പളളി മെഡിക്കൽ കോളേജ് ആശുപത്രിയിലും പ്രവേശിപ്പിച്ചിരിക്കുകയാണ്. ആരുടെയും പരിക്ക് ഗുരുതരമല്ലെന്നാണ് ലഭിക്കുന്ന വിവരം. ഇന്ന് ഉച്ചയോടെയായിരുന്നു അപകടം.

കയ​റ്റത്തിൽ നിയന്ത്രണം വിട്ട് ബസ് താഴ്ചയിലേക്ക് മറിയുകയായിരുന്നു. മരത്തിൽ തട്ടിനിന്നതുകൊണ്ട് വലിയ അപകടം ഒഴിവായെന്നാണ് നാട്ടുകാർ പറയുന്നത്.