തിരുവനന്തപുരത്ത് നിന്ന് പറന്ന വിമാനത്തിൽ സാങ്കേതിക തകരാർ; അര മണിക്കൂറിലധികം ആകാശത്ത് വട്ടംചുറ്റി

തിരുവനന്തപുരം: അബുദാബിയിലേക്ക് പുറപ്പെട്ട എയർ അറേബ്യ വിമാനം അടിയന്തരമായി തിരിച്ചിറക്കി. ഇന്നലെ രാത്രി 7.54ന് തിരുവനന്തപുരത്ത് നിന്ന് പുറപ്പെട്ട വിമാനമാണ് സാങ്കേതിക തകരാറിനെ തുടർന്ന് തിരിച്ചിറക്കിയത്.

171 യാത്രക്കാരായിരുന്നു വിമാനത്തിലുണ്ടായിരുന്നത്. വിമാനം പറന്നുയർന്നതിന് ശേഷം പിൻഭാഗത്തുള്ള ചക്രങ്ങളുടെ ഹൈഡ്രോളിക് സംവിധാനത്തിന് സാങ്കേതിക തകരാർ ഉണ്ടായതായി പൈലറ്റിന്റെ ശ്രദ്ധയിൽപ്പെടുകയായിരുന്നു. ഉടൻ തന്നെ വിമാനം തിരിച്ചിറക്കുന്നതിനുള്ള അനുമതി തേടി. വിമാനത്തിൽ അബുദാബിയിലേക്കുള്ള ദീർഘദൂര യാത്രക്കായുള്ള ഇന്ധനം ഉണ്ടായിരുന്നു.

തിരിച്ചിറങ്ങാനുള്ള ഇന്ധനം നിലനിർത്തിയ ശേഷം അധികമുള്ളത് വട്ടംചുറ്റി പറന്ന് തീർക്കാനായിരുന്നു പൈലറ്റിന് ലഭിച്ച നിർദേശം. തുടർന്ന് രാത്രി 8.30ഓടെ വിമാനം തിരിച്ചിറക്കുകയായിരുന്നു.