തിരുവനന്തപുരം : 20 ലോക്സഭാ സ്ഥാനാർത്ഥികളെയും പ്രഖ്യാപിച്ച് എൽ.ഡി.എഫ് തിരഞ്ഞെടുപ്പ് പ്രചാരണത്തിലേക്ക് കടന്നു. ഇന്നലെ സി.പി.എം 15 സീറ്റുകളിലെ സ്ഥാനാർത്ഥികളെ പ്രഖ്യാപിച്ചതോടെയാണ് ഇടതുമുന്നണിയുടെ സ്ഥാനാർത്ഥി പട്ടികയ്ക്ക് പൂർണ്ണ രൂപമായത്.
സി.പി.ഐയുടെ നാല് സ്ഥാനാർത്ഥികളെ കഴിഞ്ഞ ദിവസം പ്രഖ്യാപിച്ചിരുന്നു. കോട്ടയം സീറ്റിൽ കേരള കോൺഗ്രസ് മാണി വിഭാഗം നേരത്തേ സ്ഥാനാർത്ഥിയെ പ്രഖ്യാപിച്ച് പ്രചാരണം ആരംഭിച്ചിട്ടുണ്ട്.
തിരഞ്ഞെടുപ്പു തീയതി പ്രഖ്യാപിക്കും മുമ്പ് അസ്വാരസ്യങ്ങളില്ലാതെ സ്ഥാനാർഥികളെ രംഗത്തിറക്കിയത് ഇടതുമുന്നണിക്ക് മേൽക്കൈ നൽകിയിട്ടുണ്ട്.
യു.ഡി.എഫിൽ ആർ.എസ്.പിയും കേരള കോൺഗ്രസ് ജോസഫ് വിഭാഗവും സ്ഥാനാർത്ഥിയെ പ്രഖ്യാപിച്ച് പ്രചാരണത്തിനിറങ്ങിക്കഴിഞ്ഞു. മുസ്ലീം ലീഗ് ഇന്ന് സ്ഥാനാർത്ഥിയെ പ്രഖ്യാപിക്കും.
കോൺഗ്രസ് സ്ഥാനാർത്ഥി നിർണ്ണയം പൂർത്തിയായിട്ടില്ല. ഇന്ന് തിരുവനന്തപുരത്ത് ചേരുന്ന സ്ക്രീനിംഗ് കമ്മിറ്റി യോഗത്തിൽ അന്തിമ തീരുമാനമെടുത്തേക്കും. കണ്ണൂരിൽ കെ.പി.സി.സി അദ്ധ്യക്ഷൻ കെ.സുധാകരൻ മത്സരിക്കണമെന്ന് ഹൈക്കമാൻഡ് നിർദ്ദേശിച്ചിട്ടുണ്ട്. ആലപ്പുഴയും വയനാടുമാണ് തീരുമാനമാകാനുള്ളത്. ആലപ്പുഴയിൽ കെ.സി വേണുഗോപാലും വയനാട്ടിൽ രാഹുൽ ഗാന്ധിയും മത്സരിക്കുന്നതിൽ അവസാന തീരുമാനമായിട്ടില്ല.
എ.ഐ.സി.സി നടത്തിയ മൂന്ന് സർവ്വേയിലും വിജയസാദ്ധ്യത കുറവെന്ന് കണ്ട ചില സീറ്റുകളിലെ സ്ഥാനാർത്ഥികളെ പറ്റിയും ചർച്ച നടന്നേക്കും. ലീഗുമായുള്ള സീറ്റ് വിഭജനത്തിൽ കല്ലുകടിച്ചതും 'സമരാഗ്നി' ജാഥയ്ക്കിടയിലെ സുധാകരന്റെ പരാമർശത്തിൽ വി.ഡി സതീശനുണ്ടായ അതൃപ്തിയും അഭിപ്രായവ്യത്യാസങ്ങളും യു.ഡി.എഫിന് മങ്ങലേൽപ്പിച്ചിട്ടുണ്ട്.
കോൺഗ്രസ് സ്ക്രീനിംഗ് കമ്മിറ്റിക്ക് ശേഷം കെ.പി.സി.സി അദ്ധ്യക്ഷനും പ്രതിപക്ഷനേതാവും സ്ഥാനാർത്ഥി പട്ടികയിൽ അന്തിമ തീരുമാനമെടുക്കാൻ ഡൽഹിക്ക് പോകും. കെ.പി.സി.സി അദ്ധ്യക്ഷൻ മത്സരിക്കുന്നതിനാൽ ചുമതല താൽക്കാലികമായി കൈമാറുന്നതിലും തീരുമാനമുണ്ടാവും.
മൂന്നാംവട്ടവും പ്രധാനമന്ത്രി നരേന്ദ്രമോദിയെ ഇറക്കി ബി.ജെ.പി പ്രചാരണം കൊഴുപ്പിക്കുകയാണ്. ദിവസങ്ങൾക്കുള്ളിൽ എൻ.ഡി.എ സ്ഥാനാർത്ഥി പട്ടിക കൂടി പൂർത്തിയാവുന്നതോടെ ചില മണ്ഡലങ്ങളിൽ ത്രികോണപ്പോരാട്ടമാവും. അതും തിരഞ്ഞെടുപ്പ് ചൂട് ഉയർത്തും.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |