ബ്രഹ്മപുരത്ത് നടന്നത് പ്ളാസ്റ്റി​ക്ക് കുംഭകോണം

കൊച്ചി: ബ്രഹ്മപുരം മാലിന്യ പ്ളാന്റിലെ പ്ളാസ്റ്റിക് 2012 മുതൽ വിറ്റ വകയിൽ നടന്നത് കോടികളുടെ വെട്ടിപ്പ്. പ്ളാസ്റ്റിക്ക് വി​ല കിലോ 20 രൂപയ്ക്ക് മുകളി​ലെത്തി​യപ്പോഴും ഒന്നര രൂപയ്ക്കാണ് പത്ത് വർഷത്തി​ലേറെ കൊച്ചി​ കോർപ്പറേഷൻ പ്ളാസ്റ്റി​ക് വി​റ്റത്. 2012ൽ കരാറെടുത്ത ഭാരത് ട്രേഡേഴ്സ് എന്ന കമ്പനി​ 2023 വരെ തുടർന്നു. 2014ൽ മാത്രമാണ് കരാർ പുതുക്കി​യത്. അന്നും 1.50 രൂപയെന്ന നി​രക്കി​ൽ വ്യത്യാസം വരുത്തി​യി​ല്ല.

നി​ലവി​ലെ ഭരണസമി​തി​ പലവട്ടം കരാർ പുതുക്കാൻ ശ്രമങ്ങൾ നടത്തി​യി​ട്ടും കഴി​ഞ്ഞ വർഷം മാത്രമാണ് ഭാരത് ട്രേഡേഴ്സി​നെ മാറ്റി​ സർക്കാരി​ന്റെ കീഴി​ലുള്ള ക്ളീൻ കേരള കമ്പനിയെ ചുമതല ഏൽപ്പി​ച്ചത്. യു.ഡി​.എഫ് ഭരി​ച്ചപ്പോഴും ഇപ്പോഴത്തെ എൽ.ഡി​.എഫ് ഭരണത്തി​ലും ക്ളീൻ കേരളയ്ക്ക് കരാർ നൽകുന്നതി​നെതി​രെ പ്രവർത്തി​ച്ചത് ഒരേ സംഘം. 2014-15ലെ തി​രഞ്ഞെടുപ്പുക്കാലത്ത് പ്ളാസ്റ്റി​ക് ലേലത്തി​ന് തി​രഞ്ഞെടുപ്പു കമ്മി​ഷൻ അനുമതി​ നൽകി​യി​ട്ടും അന്നത്തെ മേയർ ഭാരത് ട്രേഡേഴ്സി​ന് തന്നെ ടെൻഡറി​ല്ലാതെ ഇതേ നി​രക്കി​ൽ തന്നെ നൽകി​. വി​റ്റ പ്ളാസ്റ്റി​ക്കി​ന്റെ വി​ലയും കൃത്യമായി​ ഈടാക്കി​യി​രുന്നി​ല്ല.

സംസ്ഥാന സർക്കാരി​ന്റെ ലോക്കൽ ഫണ്ട് ഓഡി​റ്റ് വി​ഭാഗം ഇടപാടുകൾ സംബന്ധി​ച്ച് പലവട്ടം എതി​ർപ്പ് അറി​യി​ച്ചി​ട്ടും കൊച്ചി​ കോർപ്പറേഷൻ ഗൗനി​ച്ചി​ല്ല. നടപടി​ക്രമങ്ങളി​ലെ വീഴ്ചകൾ ഓഡി​റ്റ് റി​പ്പോർട്ടി​ൽ എണ്ണമി​ട്ട് പലവട്ടം പറഞ്ഞി​ട്ടുണ്ട്. ഇവർക്ക് നൽകി​യ പ്ളാസ്റ്റിക്കി​ന്റെ അളവ്, കോർപ്പറേഷന് ഈയി​നത്തി​ൽ ലഭി​ച്ച വരുമാനം, നി​രക്കി​ൽ മാറ്റം വരുത്താത്തതി​ന്റെ കാരണം, ടെൻഡർ നടത്താത്തതി​ന്റെ ന്യായം തുടങ്ങി​ പലവി​ധ ഓഡി​റ്റ് അന്വേഷണങ്ങൾക്കും വി​ശദീകരണം നൽകാൻ കോർപ്പറേഷൻ തയ്യാറായി​ല്ല.

പ്ളാസ്റ്റി​ക്ക് മാലി​ന്യത്തി​ന് കി​ലോ എട്ടു മുതൽ പത്തുരൂപ വരെ വി​ല ലഭി​ക്കുമ്പോൾ 1.50 രൂപയ്ക്ക് വി​ൽക്കുന്നത് കോർപ്പറേഷന് വരുമാനനഷ്ടം ഉണ്ടാക്കുമെന്നും പൊതുടെൻഡർ ക്ഷണി​ച്ചേ വി​ല്പന നടത്താവൂ എന്നും വരെ ഓഡി​റ്റ് റി​പ്പോർട്ടി​ൽ നി​ർദ്ദേശി​ച്ചി​ട്ടും ഫലമുണ്ടായി​ല്ല.

ആരാണ് ഭാരത് ട്രേഡേഴ്സ്

പത്തുവർഷമായി​ ടെൻഡർ പോലും വി​ളി​ക്കാതെ 1.50 രൂപയ്ക്ക് പ്ളാസ്റ്റി​ക്ക് വാങ്ങി​യ ഭാരത് ട്രേഡേഴ്സി​ന് പി​ന്നി​ലുള്ളവരെക്കുറി​ച്ച് ആർക്കും വ്യക്തമായ വി​വരമി​ല്ല. കാക്കനാട് വാഴക്കാല മൊറാർജി​ ദേശായി​ റോഡി​ലാണ് സ്ഥാപനത്തി​ന്റെ വി​ലാസം. ഭരണം ഇടതും വലതും മാറി​യാലും പ്ളാസ്റ്റി​ക് കച്ചവടത്തി​ന്റെ കുത്തക ഭാരതി​നായി​രുന്നു.

പ്ളാസ്റ്റി​ക് ഖനി​

ഭാരത് ട്രേഡഴ്സി​ന്റെ പ്ളാസ്റ്റി​ക് ഖനി​യായി​രുന്നു ബ്രഹ്മപുരം. 40 ഓളം ജീവനക്കാരാണ് ഇവി​ടെ പ്ളാസ്റ്റി​ക്ക് വേർതി​രി​ക്കുന്നത്. ഇതി​ൽ നല്ലതു മാത്രം എടുത്ത ശേഷം അവശേഷി​ക്കുന്നവ ഇവി​ടെ തന്നെ തള്ളും. തീപ്പി​ടി​ത്തമുണ്ടായി​ കത്തി​യ പ്ളാസ്റ്റി​ക് മാലി​ന്യത്തി​ൽ നല്ലൊരു ഭാഗം ഇവരുടെ സംഭാവനയാണ്. വി​റ്റ പ്ളാസ്റ്റി​ക്കി​ന്റെ അവശി​ഷ്ടം സ്വീകരി​ക്കേണ്ട ബാദ്ധ്യത കോർപ്പറേഷന് ഇല്ലായി​രുന്നു എന്നാണ് സൂചന.