'ചുവരിലെ സ്വപ്നവീടിന് ' മാതൃക ഒരുങ്ങി

കൊല്ലം: മിഥുന്റെ കുടുംബത്തിന് കേരള സ്റ്റേറ്റ് ഭാരത് സ്കൗട്ട് ആൻഡ് ഗൈഡ്സ് നിർമ്മിച്ച് നൽകുന്ന വീടിന്റെ മാതൃക ഒരുങ്ങി. മിഥുൻ സ്വപ്നം കണ്ടപോലെയുള്ള വീടാണ് ഒരുക്കുന്നത്. രൂപരേഖ അധികൃതർ കാണിച്ചപ്പോഴും 'കാണാൻ ഭംഗിയുള്ളൊരു വീട് വേണം, എന്നിട്ടേ ഞാൻ കൂട്ടുകാരെ ഇവിടേക്ക് കൊണ്ടുവരൂ..'- എന്ന മിഥുന്റെ വാക്കുകൾ അച്ഛനമ്മമാരുടെ കാതിൽ ഇപ്പോഴും മുഴങ്ങുകയാണ്.

തേവലക്കര ബോയ്സ് ഹൈസ്കൂളിൽ എട്ടാം ക്ളാസിൽ ചേർന്നപ്പോൾ എൻ.സി.സി കേഡറ്റാകാൻ എം.മിഥുൻ വലിയ താത്പര്യമെടുത്തത് പട്ടാളക്കാരനാകാൻ ലക്ഷ്യമിട്ടായിരുന്നു. ജോലി കിട്ടിയിട്ടുവേണം നല്ലൊരു വീടുവയ്ക്കാനെന്ന് ആ കുഞ്ഞുപ്രായത്തിലേ മിഥുൻ പറഞ്ഞിരുന്നതൊക്കെ ഇപ്പോഴും ബന്ധുക്കളും കൂട്ടുകാരും ഓർക്കുന്നു. ഇല്ലായ്മകളുടെ കൂര കൂട്ടുകാർ കാണരുതെന്ന് അവൻ ആഗ്രഹിച്ചിരുന്നെങ്കിലും നിശ്ചലമായി അവൻ കിടന്നപ്പോൾ കൂട്ടുകാർ വീടും കണ്ടു.
വീടിന്റെ ചുവരിലൊക്കെ 'സ്വപ്നവീടിന്റെ' ചിത്രങ്ങൾ അവൻ വരച്ചിട്ടിരുന്നു. ഇപ്പോഴും ചുവരിൽ ആ ചിത്രങ്ങൾ തെളിഞ്ഞുകിടപ്പുണ്ട്. കഴിഞ്ഞ ദിവസം വിദ്യാഭ്യാസ മന്ത്രി നേരിട്ടെത്തി സ്വപ്നവീടിന് തറക്കല്ലിട്ടു. ആ സമയത്തും അച്ഛൻ മനുവും അമ്മ സുജയും മിഥുനെയോർത്ത് വിതുമ്പുകയായിരുന്നു.

നിർമ്മാണം ഉടൻ

 മൂന്ന് കിടപ്പ് മുറി

 രണ്ട് ടോയ്‌‌ലെറ്റ്

 ലിവിംഗ് റൂം

 അടുക്കള

 ഡൈനിംഗ് ഏരിയ

 സിറ്റൗട്ട്

 സ്റ്റെയർകെയ്സ്

വിസ്തീർണം - 1000 ചതുരശ്ര അടി

എസ്റ്റിമേറ്റ് ₹ 20 ലക്ഷം

അവന്റെ കൂട്ടുകാരെല്ലാം വല്യ വീട്ടിൽ താമസിക്കുന്നവരാണ്. അതുകൊണ്ടുതന്നെ ഇവിടേക്ക് കൊണ്ടുവരാറില്ലായിരുന്നു. ഒരു വീടെന്നത് ഞങ്ങൾ നാലുപേരുടെയും സ്വപ്നമായിരുന്നു. അത് എന്റെ മോൻ സാധിച്ചുതന്നു. പക്ഷെ, ഇന്നവൻ അരികിലില്ല...

അമ്മ സുജ