വിദ്യാർത്ഥിനികൾക്ക് ആശ്വാസം സാനിട്ടറി നാപ്കിൻ സംസ്കരിക്കാൻ സ്കൂളുകളിൽ ഇൻസിനറേറ്ററുകൾ

ആദ്യഘട്ടത്തിൽ ജില്ലയിലെ 21 സ്കൂളുകളിൽ സ്ഥാപിക്കും

കൊല്ലം: സാനി​ട്ടറി​ നാപ്കിനുകൾ ശാസ്ത്രീയമായി സംസ്കരിക്കുകയെന്ന ലക്ഷ്യത്തോടെ, ജി​ല്ലയി​ൽ 21 സ്കൂളുകളി​ലെ ടോയ്ലെറ്റ് ബ്ലോക്കുകളിൽ ഇൻസിനറേറ്ററുകൾ സ്ഥാപിക്കുന്ന പദ്ധതി ഈ മാസം ആരംഭിച്ചേക്കും. ഹരിത കേരളം മിഷന്റെ 'നെറ്റ് സീറോ കാർബൺ' പദ്ധതിയുടെ ഭാഗമായാണ് ഇവ സ്ഥാപിക്കുന്നത്.

ഒരു ഇൻസിനറേറ്രർ സ്ഥാപിക്കാൻ 50,000 രൂപയോളമാണ് ചെലവ് പ്രതീക്ഷിക്കുന്നത്. പദ്ധതി ആരംഭിക്കുന്നതുമായി ബന്ധപ്പെട്ട നടപടികൾ പുരോഗമി​ക്കുന്നു. മലനീകരണ നിയന്ത്രണ ബോ‌ർഡിന്റെ നിർദ്ദേശങ്ങൾക്ക് അനുസൃതമായാണ് നടപ്പാക്കുന്നത്. മെൻസ്ട്രൽ കപ്പ് ഉപയോഗം പ്രോത്സാഹിപ്പിക്കുമ്പോഴും ഭൂരിപക്ഷം പേർക്കും സാനിട്ടറി നാപ്കിനുകളോടാണ് പ്രി​യം. അതിനാൽ ഇവ പ്രകൃതി​ സൗഹൃദമായി​ സംസ്കരിക്കാൻ എല്ലാ ബ്ലോക്ക് പഞ്ചായത്തുകളിലും നഗരസഭകളിലും ഒന്നുവീതം സ്കൂളുകളിലെങ്കി​ലും ഇൻസി​നറേറ്ററുകൾ സ്ഥാപിക്കാനാണ് സംസ്ഥാനതലത്തിൽ നിന്നുള്ള നിർദ്ദേശം.

ആദ്യഘട്ടത്തിൽ ജില്ലയിൽ 11 ബ്ലോക്കുകൾ, കൊല്ലം കോർപ്പറേഷൻ, നഗരസഭകൾ എന്നി​വി​ടങ്ങളി​ലെ 21 ഹയർ സെക്കൻഡറി​ സ്കൂളുകളെയാണ് തി​രഞ്ഞെടുത്തി​രി​ക്കുന്നത്. ഇവിടത്തെ ഹൈസ്കൂൾ വിദ്യാർത്ഥികൾക്കും പ്രയോജനപ്പെടുത്താം. ഇൻസിനറേറ്റർ എങ്ങനെ ഉപയോഗിക്കണമെന്നതിനെപ്പറ്റി അദ്ധ്യാപകർക്കും വിദ്യാ‌ർത്ഥികൾക്കും ക്ലാസ് നൽകും. ആദ്യഘട്ടം പൂർത്തിയായ ശേഷം മറ്റ് സ്കൂളുകളിലേക്ക് വ്യാപിപ്പിക്കും.

പരിസ്ഥിതിക്ക് ദോഷമില്ല

 മലിനീകരണ നിയന്ത്രണബോ‌ഡിന്റെ മാനദണ്ഡങ്ങൾ പാലിച്ചാണ് പദ്ധതി

 വൈദ്യുതി കണക്ഷനുണ്ടെങ്കിൽ വളരെ വേഗം സ്ഥാപിക്കാനാവും

 ടോയ്ലെറ്റുകളിൽ പവർ പ്ലഗ് സ്ഥാപിക്കണം.

 സ്വിച്ച് ഇട്ടശേഷം യന്ത്രത്തിൽ നാപ്കിൻ നിക്ഷേപിച്ചാൽ ചാരമായി മാറും.

 ഇത് പിന്നീട് നീക്കം ചെയ്യണം

 എച്ച്.എൽ.എൽ ലൈഫ് കെയർ ലിമിറ്റഡാണ് യന്ത്രം നൽകുന്നത്

 പ്രതിദിനം നൂറോളം നാപ്കിനുകൾ സംസ്കരിക്കാനാവും

ഉപേക്ഷിക്കുന്ന നാപ്കിനുകൾ പ്രകൃതിക്ക് ദോഷമാകാത്തവിധം ശാസ്ത്രീയമായി സംസ്‌കരിക്കുകയുമാണ് ലക്ഷ്യം. ജില്ലയിലെ തിരഞ്ഞെടുത്ത സ്കൂളുകളിലാണ് ഇൻസിനറേറ്ററുകൾ സ്ഥാപിക്കുന്നത്. വൈകാതെ പദ്ധതി ഉദ്ഘാടനം ചെയ്യും

എസ്. ഐസക്, ജില്ലാ കോ ഓർഡിനേറ്റർ, ഹരിതകേരളം മിഷൻ