നാട്ടിക നിയോജകമണ്ഡലം തീര സദസ്

തൃപ്രയാർ: മത്സ്യത്തൊഴിലാളികളുടെ പ്രശ്‌നങ്ങൾ ചർച്ച ചെയ്യാനായി സംഘടിപ്പിക്കുന്ന നാട്ടിക നിയോജക മണ്ഡലം തീര സദസ് തിങ്കളാഴ്ച രാവിലെ ഒമ്പതരയ്ക്ക് തൃപ്രയാർ ടി.എസ്.ജി.എ സ്റ്റേഡിയത്തിൽ നടക്കുമെന്ന് സി.സി.മുകുന്ദൻ എം.എൽ.എ അറിയിച്ചു. മന്ത്രി സജി ചെറിയാൻ ഉദ്ഘാടനം ചെയ്യും. മന്ത്രിമാരായ കെ.രാജൻ, കെ.രാധാകൃഷ്ണൻ, ആർ.ബിന്ദു, ടി.എൻ.പ്രതാപൻ എം.പി എന്നിവർ പങ്കെടുക്കും. മത്സ്യത്തൊഴിലാളി, ഉൾനാടൻ മത്സ്യത്തൊഴിലാളി എന്നീ വിഭാഗങ്ങളിൽ നിന്ന് ഓൺലൈനായി 89 പരാതികൾ ലഭിച്ചിട്ടുണ്ട്. കൂടാതെ 50 പരാതികൾ നേരിട്ടും ലഭിച്ചിട്ടുണ്ട്. അന്നേദിവസം ലഭിക്കുന്ന പരാതികളും സ്വീകരിക്കും. വിവിധ വിഷയങ്ങളെ സംബന്ധിച്ച് ജനപ്രതിനിധികളുമായി മന്ത്രി ചർച്ച നടത്തും. നാട്ടിക പഞ്ചായത്ത് പ്രസിഡന്റ് എം.ആർ.ദിനേശൻ, ഫിഷറീസ് വകുപ്പ് ഉദ്യോഗസ്ഥരായ കെ.ടി.അനിത, പി.എസ്.അനിത, ട്രേഡ് യൂണിയൻ നേതാക്കളായ ലാൽ കച്ചില്ലം, എം.കെ.വസന്തൻ എന്നിവരും വാർത്താസമ്മേളനത്തിൽ പങ്കെടുത്തു.