ന്യൂഡൽഹി: ആഗോള വ്യോമയാന ചരിത്രത്തിലെ ഏറ്റവും വലിയ ഓർഡർ എന്ന പെരുമയോടെ 470 പുത്തൻ വിമാനങ്ങൾ വാങ്ങാനൊരുങ്ങുന്ന എയർഇന്ത്യ ചെലവിടുക 7,​000 കോടി ഡോളർ (ഏകദേശം 5.74 ലക്ഷം കോടി രൂപ)​. അമേരിക്കൻ കമ്പനിയായ ബോയിംഗിൽ നിന്ന് 220,​ ഫ്രഞ്ച് കമ്പനിയായ എയർബസിൽ നിന്ന് 250 എന്നിങ്ങനെ പുത്തൻ വിമാനങ്ങൾക്കാണ് ഓർഡർ.

അന്താരാഷ്‌ട്രതലത്തിലെ ധനസമാഹരണം,​ ഓഹരിവില്പന തുടങ്ങിയ മാർഗങ്ങളിലൂടെയാകും പണം കണ്ടെത്തുകയെന്ന് എയർഇന്ത്യ സി.ഇ.ഒ കാംബെൽ വിൽസൺ പറഞ്ഞു. ഈവർഷം അവസാനം മുതൽ അടുത്ത ദശാബ്ദത്തിനകം പുത്തൻ വിമാനങ്ങൾ എയർഇന്ത്യയുടെ ഭാഗമാകും. ഇത് കൂടുതൽ വിദേശനഗരങ്ങളിലേക്ക് സാന്നിദ്ധ്യമറിയിക്കാനും വിപണിവിഹിതം ഉയർത്താനും സഹായിക്കുമെന്നാണ് പ്രതീക്ഷ. പുതുതായി 4,​200 കാബിൻ ക്രൂവിനെയും 900 പൈലറ്റുമാരെയും നിയമിക്കാനും എയർഇന്ത്യ തീരുമാനിച്ചിട്ടുണ്ട്.