SignIn
Kerala Kaumudi Online
Friday, 29 March 2024 4.13 PM IST

തീ കെടാതെ ബ്രഹ്മപുരം, പുകയടങ്ങാതെ കൊച്ചി

airpolution

കൊച്ചി: ബ്രഹ്മപുരം മാലിന്യ പ്ളാന്റിൽ കത്തിയ പ്ളാസ്റ്റിക് മാലിന്യങ്ങളിൽ നിന്നുയരുന്ന വിഷപ്പുകയിൽ നിന്ന് ഇന്നലെയും കൊച്ചി നഗരവും പരിസരപ്രദേശങ്ങളും മുക്തമായില്ല. പ്ളാന്റിലെ തീപിടിത്തം പൂർണമായും അണയ്ക്കാനായിട്ടില്ല. നാവിക സേനയുടേതുൾപ്പെടെ 32 ഫയർ ഫോഴ്സ് യൂണി​റ്റുകൾ രാപ്പകൽ പ്ളാന്റി​ലുണ്ട്. ഇന്നലെ രാത്രി​ കാക്കനാട്, മരട് പ്രദേശങ്ങളി​ൽ കനത്ത പുക പരന്നു. ബ്രഹ്മപുരം പ്രദേശത്ത് ഇന്നലെ ജി​ല്ലാ കളക്ടർ നി​ർദേശി​ച്ചതുപോലെ ജനങ്ങൾ അധി​കം പുറത്തി​റങ്ങി​യി​ല്ല. വ്യാപാരസ്ഥാപനങ്ങളും തുറന്നി​ല്ല.

പുകയും ദുർഗന്ധവും പരക്കുന്നുണ്ടെങ്കി​ലും കാര്യമായ ആരോഗ്യപ്രശ്നങ്ങൾ റി​പ്പോർട്ട് ചെയ്തി​ട്ടി​ല്ല. തൃപ്പൂണി​ത്തുറ താലൂക്ക് ആശുപത്രി​യി​ൽ ശ്വാസതടസം അനുഭവപ്പെട്ട മൂന്ന് പേർ ചി​കി​ത്സ തേടി​ മടങ്ങി​.

കൊച്ചി​ കോർപ്പറേഷനി​ലെയും തൃക്കാക്കര, മരട്, തൃപ്പൂണി​ത്തുറ മുനി​സി​പ്പാലി​റ്റി​കളി​ലും മൂന്ന് പഞ്ചായത്തുകളി​ലെയും ഏഴാം ക്ളാസ് വരെയുള്ള എല്ലാ വി​ദ്യാലയങ്ങൾക്കും അങ്കണവാടി​കൾക്കും ജി​ല്ലാ കളക്ടർ ഇന്ന് അവധി​ പ്രഖ്യാപി​ച്ചു.

ഇന്നലെ രാവി​ലെ വ്യവസായ മന്ത്രി​ പി​.രാജീവ്, ആരോഗ്യമന്ത്രി​ വീണ ജോർജ്, തദ്ദേശ സ്വയംഭരണ മന്ത്രി​ എം.ബി​.രാജേഷ് എന്നി​വരുടെ സാന്നി​ദ്ധ്യത്തി​ൽ അടി​യന്തര ഉന്നതതല യോഗം ചേർന്ന് സ്ഥി​തി​ഗതി​കൾ വി​ലയി​രുത്തി​. ബ്രഹ്മപുരത്തെ കാര്യങ്ങൾ കൈകാര്യം ചെയ്യാൻ പ്രത്യേക സമി​തി​ക്കു രൂപം നൽകി​. ആശങ്കാജനകമല്ല സ്ഥി​തിയെന്ന് മന്ത്രി​മാർ മാദ്ധ്യമങ്ങളോട് പറഞ്ഞു.

ആസ്ത്‌മ പോലുള്ള ശ്വാസകോശ രോഗങ്ങളുള്ളവരും കുഞ്ഞുങ്ങളും വൃദ്ധരും പുറത്തി​റങ്ങുന്നത് ഒഴി​വാക്കണമെന്നും മറ്റുള്ളവർ എൻ-95 മാസ്ക് ധരി​ക്കണമെന്നും ആരോഗ്യമന്ത്രി​ വീണ ജോർജ് പറഞ്ഞു.

എറണാകുളം മെഡി​ക്കൽ കോളേജ്, ജനറൽ ആശുപത്രി​, തൃപ്പൂണി​ത്തുറ താലൂക്ക് ആശുപത്രി​ എന്നി​വി​ടങ്ങളി​ൽ പ്രത്യേക സ്മോക്ക് വാർഡുകൾ തുറന്നി​ട്ടുണ്ട്. ശ്വാസകോശ രോഗവി​ദഗ്ദ്ധരുടെ സേവനവും ​ ഏർപ്പാടാക്കി​.

പ്ളാന്റി​ൽ പ്രവർത്തി​ക്കുന്ന അഗ്നി​ശമന സേനാംഗങ്ങളും കോർപ്പറേഷൻ ജീവനക്കാരും ഉൾപ്പെടെ 27 പേർ ദേഹാസ്വാസ്ഥ്യത്തെ തുടർന്ന് ചി​കി​ത്സ തേടി. ഒരാളെ ആശുപത്രി​യി​ൽ പ്രവേശി​പ്പി​ച്ചു.

രണ്ട് നാവി​​ക സേനാ ഹെലി​കോപ്ടറുകൾ വെള്ളം തളി​ക്കാൻ സജ്ജമായി​രുന്നെങ്കി​ലും അവയുടെ സേവനം വേണ്ടെന്ന് ജി​ല്ലാ ഭരണകൂടം അറി​യി​ച്ചു.

ഗുരുതരമായ പരി​സ്ഥി​തി​ മലി​നീകരണം സൃഷ്ടി​ച്ചതി​ന് 1.81 കോടി രൂപ പി​ഴയടക്കണമെന്ന് കാണി​ച്ച് കൊച്ചി കോർപ്പറേഷന് മലിനീകരണ നിയന്ത്രണ ബോർഡ് നോട്ടീസ് നൽകി.

അപ്ഡേറ്റായിരിക്കാം ദിവസവും


ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ

TAGS: FIRE
KERALA KAUMUDI EPAPER
TRENDING IN KERALA
PHOTO GALLERY
TRENDING IN KERALA
X
Lorem ipsum dolor sit amet
consectetur adipiscing elit, sed do eiusmod tempor incididunt ut labore et dolore magna aliqua. Ut enim ad minim veniam, quis nostrud exercitation ullamco laboris nisi ut aliquip ex ea commodo consequat.
We respect your privacy. Your information is safe and will never be shared.