ശനിയാഴ്ച വരെ ശക്തമായ മഴ

തിരുവനന്തപുരം: സംസ്ഥാനത്ത് ശനിയാഴ്ച വരെ ശക്തമായ മഴ തുടരുമെന്ന് കാലാവസ്ഥ വകുപ്പ്. വടക്കൻ ജില്ലകളിൽ മഴ കൂടുതൽ ശക്തമാകുമെന്നും തെക്കൻ ജില്ലകളിൽ ഒറ്റപ്പെട്ടമഴ ലഭിക്കുമെന്നും വകുപ്പ് അറിയിച്ചു. ഇതോടെ ഇടുക്കി, മലപ്പുറം,വയനാട് ജില്ലകളിൽ ഓറഞ്ച് അലർട്ടും പത്തനംതിട്ട,കോട്ടയം,എറണാകുളം,തൃശൂർ,പാലക്കാട്,കോഴിക്കോട്,കണ്ണൂർ, കാസർകോട് ജില്ലകളിൽ യെല്ലോ അലർട്ടും പ്രഖ്യാപിച്ചു. കാസർകോട്,കോഴിക്കോട്,വയനാട്,കണ്ണൂർ എന്നിവിടങ്ങളിലെ മലയോര മേഖലകളിൽ മിന്നൽ പ്രളയത്തിനും സാദ്ധ്യത. മലയോര മേഖലകളിൽ മണ്ണിടിച്ചിൽ സാദ്ധ്യതയുള്ളതിനാൽ ജാഗ്രത പാലിക്കണമെന്നും അപകടസാദ്ധ്യത മുന്നിൽക്കണ്ട് മാറിത്താമസിക്കാനും നിർദ്ദേശമുണ്ട്. മണിക്കൂറിൽ 65 കിലോമീറ്റർ‌ വരെ വേഗത്തിൽ ശക്തമായ കാറ്രിനും സാദ്ധ്യത. തീരങ്ങളിൽ കടലാക്രമണ സാദ്ധ്യത മുന്നറിയിപ്പും പ്രഖ്യാപിച്ചു.