കൊവിഡ് ആശ്രിത ധനസഹായം അർഹത നേടിയ ആദ്യ 10 പേർ ജില്ലയിൽ

കൊല്ലം: കൊവിഡ് ബാധിച്ച് മരിച്ചവരുടെ ആശ്രിതർക്ക് 50,000 രൂപ വീതം വിതരണം ചെയ്യുന്ന ധനസഹായ പദ്ധതിയിൽ അർഹരായ ആദ്യത്തെ പത്ത് പേർ ജില്ലയിൽ നിന്നാണെന്ന് കളക്ടർ അഫ്‌സാന പർവീൺ അറിയിച്ചു. ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് നേരിട്ട് സഹായധനം നിക്ഷേപിക്കും. ധനസഹായത്തിനായി ജില്ലയിലാകെ 559 അപേക്ഷകളാണ് ഇതുവരെ ലഭിച്ചത്. ബി.പി.എൽ കുടുംബങ്ങളുടെ ആശ്രിതർക്ക് 5,000 രൂപ വീതം ധനസഹായം ലഭിക്കുന്നതിനായി ജില്ലയിൽ 170 അപേക്ഷകളും നൽകിയിട്ടുണ്ട്.

റവന്യു വകുപ്പിന്റെ റിലീഫ് പോർട്ടൽ വഴി നൽകുന്ന ഓൺലൈൻ അപേക്ഷ വിവിധതലങ്ങളിൽ പരിശോധിച്ച ശേഷം കളക്ടറാണ് നടപടികൾ സ്വീകരിക്കുന്നത്. അപേക്ഷകളെല്ലാം സമയബന്ധിതമായി പൂർത്തിയാക്കി അർഹതപ്പെട്ടവർക്ക് ധനസഹായം എത്രയും വേഗം ലഭ്യമാക്കുമെന്നും കളക്ടർ അറിയിച്ചു.