മറവൻതുരുത്തിൽ വീടിന് തീപിടിച്ചു

തലയോലപ്പറമ്പ് : അതിപുരാതനമായ നാലുകെട്ട് വീട് തീപിടിച്ച് കത്തിനശിച്ചു. മറവൻതുരുത്ത് മണിയശ്ശേരി ക്ഷേത്രത്തിന് സമീപം കുഴിക്കേടത്ത് അഭിലാഷിന്റെ ഉടമസ്ഥതയിലുള്ള വീടിനാണ് തീപിടിച്ചത്. ഒരു നൂറ്റാണ്ട് പഴക്കമുള്ള കുടുംബവീട് ഭൂരിഭാഗവും തടിയിൽ തീർത്തതാണ്. തിങ്കളാഴ്ച രാത്രി 11 ഓടെയാണ് സംഭവം. ആൾത്താമസം ഇല്ലാതിരുന്നതിനാൽ വൻ ദുരന്തം ഒഴിവായി. വൈക്കത്ത് നിന്ന് ഫയർഫോഴ്‌സ് യൂണിറ്റ് എത്തിയെങ്കിലും വാഹനം കടന്ന് ചെല്ലാൻ മാർഗ്ഗം ഇല്ലാത്തതിനാൽ രക്ഷാപ്രവർത്തനത്തെ ബാധിച്ചു.തലയോലപ്പറമ്പ് എസ്.ഐ പി.എസ് സുധീരന്റെ നേതൃത്വത്തിൽ പൊലീസും സ്ഥലത്തെത്തിയിരുന്നു. ഷോർട്ട് സർക്യൂട്ടാണ് കാരണമെന്നാണ് പ്രാഥമിക നിഗമനം.