വാക്‌സിൻ മിത്ര അവാർഡ് മാർ ഏലിയാ കത്തീഡ്രലിന്

കോട്ടയം: 2022ലെ കൊവിഡ് വാക്‌സിനേഷൻ പ്രവർത്തനത്തിന് നൽകിയ സംഭാവന പരിഗണിച്ച് ജില്ലാതലത്തിൽ ഏർപ്പെടുത്തിയ 'വാക്‌സിൻ മിത്ര" പുരസ്‌കാരം കോട്ടയം മാർ ഏലിയാ കത്തീഡ്രലിന് നൽകി. ദേശീയ വിരമുക്തി ദിനത്തോടനുബന്ധിച്ചു കോട്ടയം മൗണ്ട് കാർമൽ സ്‌കൂളിൽ നടന്ന ചടങ്ങിൽ പുരസ്‌കാരം തിരുവഞ്ചൂർ രാധാകൃഷ്ണൻ എം.എൽ.എയിൽ നിന്ന് ഫാ. സൈബു സ്‌കറിയ ഏറ്റുവാങ്ങി. 2021 നവംബർ രണ്ടു മുതൽ 2022 ഒക്‌ടോബർ 10 വരെ സെന്റ് ലാസറസ് പള്ളിയുടെ ഹാൾ എല്ലാ സൗകര്യങ്ങളോടും കൂടെ ആരോഗ്യവകുപ്പിന് സൗജന്യമായി വിട്ടുനൽകുകയും 28,000 പേർക്ക് വാക്‌സിൻ നൽകാൻ സൗകര്യമൊരുക്കുകയും ചെയ്തത് പരിഗണിച്ചാണ് പുരസ്‌കാരം നൽകിയത്.