അഴക് പദ്ധതിക്ക് ഊർജം പകരാൻ ജാനു ടീം ഒരുക്കിയ വീഡിയോയും

കോഴിക്കോട് : കോഴിക്കോട് കോർപ്പറേഷന്റെ 'അഴക്' ഉറവിട മാലിന്യ സംസ്‌കരണ പദ്ധതിയുടെ പ്രചാരണ വീഡിയോ പുറത്തിറക്കി. മേയർ ഡോ.ബീന ഫിലിപ്പ് വീഡിയോ പ്രകാശനം ചെയ്തു. സാമൂഹിക മാദ്ധ്യമങ്ങളിൽ ഉൾപ്പെടെ പ്രചാരം നേടിയ ജാനു തമാശകൾ ടീമാണ് വീഡിയോ തയ്യാറാക്കിയത്. ഉറവിട മാലിന്യ സംസ്‌കരണത്തെ കുറിച്ച് സന്ദേശം പകരുന്നതാണ് ഒന്നര മിനുട്ട് ദൈർഘ്യമുള്ള വീഡിയോ. ഉറവിട മാലിന്യ സംസ്‌കരണത്തിനായി കോർപ്പറേഷൻ പരിധിയിൽ 53,062 ആധുനിക മാലിന്യ സംസ്‌കരണ ഉപകരണങ്ങളാണ് സബ്‌സിഡി നിരക്കിൽ വിതരണം ചെയ്യുന്നത്. 21.5 കോടി രൂപയാണ് ചെലവ്. പദ്ധതിക്കായി ഇനിയും അപേക്ഷിക്കാൻ ബാക്കിയുള്ള കുടുംബങ്ങൾ എത്രയും വേഗത്തിൽ കൗൺസിലർമാരുമായും ഹെൽത്ത് ഇൻസ്‌പെക്ടർ ഓഫീസുകളുമായും ബന്ധപ്പെട്ട് അപേക്ഷ നൽകണമെന്ന് മേയർ അറിയിച്ചു. ചടങ്ങിൽ ഡെപ്യൂട്ടി മേയർ മുസാഫർ അഹമ്മദ്, ആരോഗ്യ സ്റ്റാന്റിംഗ് കമ്മിറ്റി ചെയർപേഴ്‌സൺ ഡോ.എസ്. ജയശ്രി, കോർപ്പറേഷൻ സെക്രട്ടറി കെ.യു. ബിനി, ഹെൽത്ത് സൂപ്പർവൈസർ ബെന്നി മാത്യു, ഹെൽത്ത് ഇൻസ്‌പെക്ടർമാർ തുടങ്ങിയവർ പങ്കെടുത്തു.