ഇൻഫോപാർക്കുമായി ധാരണ പത്രം ഒപ്പു വച്ച് ജിയോജിത്;  ഒന്നേകാൽ ഏക്കറി​ൽ ഒരുങ്ങുന്നു  ഒന്നേകാൽ ലക്ഷം ചതുരശ്രഅടി​യുടെ പദ്ധതി​

കൊച്ചി; സംസ്ഥാനത്തെ ഐടി, ഫിനാൻഷ്യൽ, ഇൻവെസ്റ്റ്‌മെന്റ് മേഖലകളുടെ സമഗ്രവികസനക്കുതിപ്പിന് കരുത്ത് പകർന്ന് കൊച്ചി ഇൻഫോപാർക്കുമായി കൈകോർത്ത് ജിയോജിത്. ഇൻഫോപാർക്ക് രണ്ടാം ഘട്ടത്തി​ൽ ഒന്നേകാൽ ഏക്കർ സ്ഥലത്തായി മൂന്ന് ഘട്ടങ്ങളിലായി ഒന്നേകാൽ ലക്ഷത്തോളം ചതുരശ്ര അടിയിൽ ഒരുക്കുന്ന പദ്ധതിക്കുള്ള ധാരണാപത്രമാണ് ഇൻഫോപാർക്ക് ചീഫ് എക്‌സിക്യൂട്ടീവ് ഓഫീസർ സുശാന്ത് കുറുന്തിലും ജിയോജിത് മാനേജിംഗ് ഡയറക്ടർ സി. ജെ. ജോർജും ഒപ്പുവച്ചത്. കൊച്ചി ഇൻഫോപാർക്കിലെ പാർക്ക് സെന്ററിൽ നടന്ന ചടങ്ങിൽ ഇൻഫോപാർക്ക് അധികൃതർ, ജിയോജിത് എക്‌സിക്യുട്ടീവ് ഡയറക്ടറുമാരായ എ ബാലകൃഷ്ണൻ, സതീഷ് മേനോൻ, ജോൺസ് ജോർജ്, സിഎഫ്ഒ മിനി നായർ തുടങ്ങിയവർ പങ്കെടുത്തു.

ആദ്യ ഘട്ടത്തിൽ 55000 ചതുരശ്ര അടി സ്ഥലത്ത് ജിയോജിത്തിന്റെ ഡാറ്റാ സെന്റർ, കസ്റ്റമർ കെയർ, പെരിഫറി പ്രവർത്തനങ്ങൾക്കായുള്ള നിർമ്മാണങ്ങൾ ആരംഭിക്കും. നിർമ്മാണം പൂർത്തിയാകുന്നതോടെ ജിയോജിത് ടെക്‌നോളജീസിന്റെ ഡെവലപ്‌മെന്റ് സെന്ററും ഇൻഫോപാർക്ക് ഫേസ് രണ്ടിലേയ്ക്ക് മാറും. പദ്ധതിയുടെ ഭാഗമായി ടെലി ട്രേഡിംഗ് സെന്ററുകൾ, കസ്റ്റമർ എക്‌സ്പീരിയൻസ് ഡവലപ്‌മെന്റ് സെന്ററുകൾ, സോഫ്റ്റ് വെയർ ലാബുകൾ, വിശാലമായ പാർക്കിംഗ് സൗകര്യം തുടങ്ങിയ ഒട്ടേറെ സൗകര്യങ്ങൾ ഒരുക്കുന്നുണ്ട്.

പ്രതിഭാശാലികളായ പ്രൊഫഷണൽസ്, സുസ്ഥിരമായ അടിസ്ഥാന സൗകര്യങ്ങൾ, സുരക്ഷിതമായ കാമ്പസ്, ഏകജാലക ക്ലിയറൻസുകൾ എന്നിവയാണ് ഇൻഫോപാർക്കിലേക്ക് ജിയോജിത്തിനെ ആകർഷിച്ച പ്രധാന സവിശേഷതകളെന്ന് ജിയോജിത് മാനേജിംഗ് ഡയറക്ടർ സി.ജെ. ജോർജ് പറഞ്ഞു. ഇൻഫോപാർക്കിൽ പ്രവർത്തിക്കുന്നത് ജിയോജിത്തിന്റെ ടെക്‌നോളജി ടീമിനെയും ഡാറ്റാ സെന്ററിനെയും വിപുലീകരിക്കാൻ സഹായിക്കുമെന്നും ജിയോജിത്തിന്റെ ബിസ്‌നസ് വിപുലീകരണവും പുരോഗമന പ്രവർത്തനങ്ങളും ഇൻഫോപാർക്കിലെ പ്രധാന കമ്പനികളിലൊന്നായിത്തീരാൻ സഹായിക്കുമെന്നും അദ്ദേഹം കൂട്ടിച്ചേർത്തു.

ഇൻഫോപാർക്കുമായുള്ള ജിയോജിത്തിന്റെ സഹകരണം മികച്ച പങ്കാളിത്തമാണ്. കൂടുതൽ തൊഴിൽ സൃഷ്ടിക്കുന്നതിനും മികച്ച നിക്ഷേപത്തിനും വഴിയൊരുക്കുമെന്ന് ഇൻഫോപാർക്കിലെ ഏറ്റവും പുതിയ വിപുലീകരണത്തെക്കുറിച്ച് ഇൻഫോപാർക്ക് സി.ഇ.ഒ സുശാന്ത് കുറുന്തിൽ പറഞ്ഞു. ഫിൻടെക്കിന്റെ വളർന്നുവരുന്ന കേന്ദ്രമായി കേരളത്തെ കാണുന്ന സ്ഥാപനങ്ങളെ ഇത് ആകർഷിക്കും. ഈ പങ്കാളിത്തം മറ്റ് വൻകിട കമ്പനികളെയും സ്വാധീനിക്കാൻ സാധിക്കുന്നവയാണെന്ന് അദ്ദേഹം പറഞ്ഞു.

കാപ്ഷൻ:

ഇൻഫോപാർക്ക് ചീഫ് എക്‌സിക്യൂട്ടീവ് ഓഫീസർ സുശാന്ത് കുറുന്തിലും ജിയോജിത് മാനേജിങ് ഡയറക്ടർ സി ജെ ജോർജ്ജും ധാരണാപത്രം കൈമാറുന്നു.