11 യാത്രക്കാരുമായി പോയ വിമാനം അപ്രത്യക്ഷമായി; തെരച്ചിൽ ഊർജിതം

ജക്കാർത്ത: ഇന്തോനേഷ്യയിൽ നിന്ന് 11 യാത്രക്കാരുമായി പറന്ന വിമാനം കാണാതായി. ഇന്ന് ഉച്ചയ്ക്ക് ജാവ ദ്വീപിൽ നിന്നും സുലവേസി ദ്വീപിലേക്ക് പോയ ഇന്തോനേഷ്യ എയർ ട്രാൻസ്‌പോർട്ട് കമ്പനിയുടെ എടിആർ 42-500 വിമാനമാണ് റഡാറിൽ നിന്ന് അപ്രത്യക്ഷമായത്. വിമാനത്തിനായി തെരച്ചിൽ നടത്തുകയാണ്.

യോക്യാകർത്തയിൽ നിന്നും സൗത്ത് സുലവേസിയിലെ മകാസറിലേക്ക് പോവുകയായിരുന്നു വിമാനം. പ്രാദേശിക സമയം ഉച്ചയ്ക്ക് 1.17ഓടെ സൗത്ത് സുലവേസിയിലെ മാറൂസ് ജില്ലയിലുള്ള ലിയാംഗ് - ലിയാംഗ് എന്ന പർവതമേഖലയിൽ വച്ചാണ് വിമാനവുമായുള്ള ബന്ധം വിച്ഛേദിക്കപ്പെട്ടത്. എട്ട് ജീവനക്കാരും ഫിഷറീസ് മന്ത്രാലയത്തിലെ മൂന്ന് ഉദ്യോഗസ്ഥരുമാണ് വിമാനത്തിലുണ്ടായിരുന്നത്.