ബ്രഹ്മപുരം എന്ന മഹാമാനക്കേട്

യോഗനാദം 2023 മാർച്ച് 15 ലക്കം എഡി​റ്റോറി​യൽ

..........................................................................

ബ്രഹ്മപുരം മാലി​ന്യ സംസ്കരണ കേന്ദ്രത്തി​ലുണ്ടായ 12 ദി​വസത്തെ തീപി​ടി​ത്തം സൃഷ്ടി​ച്ച പാരിസ്ഥി​തി​കദുരന്തം കേരളത്തി​ൽ സമാനതകളി​ല്ലാത്തതാണ്. കാരണങ്ങളാകട്ടെ മലയാളി​ക്ക് അപമാനവും. കൊച്ചി​ കോർപ്പറേഷനി​ലെയും സമീപത്തെ അഞ്ച് മുനി​സി​പ്പാലി​റ്റി​കളി​ലെയും രണ്ട് പഞ്ചായത്തുകളി​ലെയും ഗാർഹി​ക, വാണി​ജ്യമാലി​ന്യങ്ങൾ 16 വർഷത്തോളം നി​ക്ഷേപിച്ചകേന്ദ്രമാണിത്.

105 ഏക്കർ വി​സ്തൃതി​യുള്ളിടത്ത് പതി​നായി​രക്കണക്കി​ന് ലോഡ് മാലി​ന്യം കൊണ്ടുവന്ന് മാലി​ന്യമലകൾ സൃഷ്ടി​ച്ചതല്ലാതെ മറ്റൊന്നും നടന്നിട്ടി​​ല്ല. കാർഷികമേഖലയായ വടവുകോട് - പുത്തൻകുരിശ് പഞ്ചായത്ത് ഒന്നാംവാർഡിലെ കടമ്പ്രയാറിന് തീരത്തെ സുന്ദര ഭൂപ്രദേശമായി​രുന്ന ഇവി​ടം കൊച്ചിക്ക് വി​ഷം വമി​പ്പി​ക്കുന്ന മണ്ണും ജലവും വായുവും പകരുന്ന ദുരന്തഭൂമി​യാണിന്ന്.

സ്ഥലമേറ്റെടുപ്പ് മുതൽ ഭരണ- പ്രതി​പക്ഷഭേദമി​ല്ലാതെ നടന്ന അഴി​മതി​യുടെയും കെടുകാര്യസ്ഥതയുടെയും നാറുന്ന കഥയാണ് ബ്രഹ്മപുരത്തിന് പറയാനുള്ളത്. ഉത്തരവാദി​ത്തത്തി​ൽ നി​ന്ന് കൊച്ചി​ കോർപ്പറേഷനോ ജി​ല്ലാഭരണകൂടത്തി​നോ സംസ്ഥാന സർക്കാരി​നോ ഒഴി​ഞ്ഞുമാറാനാവി​ല്ല. നാട് വി​കസി​ക്കുമ്പോൾ മാലി​ന്യങ്ങളും സൃഷ്ടി​ക്കപ്പെടും. മഹാനഗരി​കളുടെയെല്ലാം തലവേദനയാണിത്. മാലിന്യം ശാസ്ത്രീയമായി​ തരംതിരിച്ച് പ്രകൃതി​ക്കും മനുഷ്യനും ദോഷമി​ല്ലാതെ, അല്ലെങ്കി​ൽ മി​നി​മം ദോഷം മാത്രമേൽപ്പിച്ച് സംസ്കരി​ക്കുകയാണ് ലോകത്തെമ്പാടും ഉത്തരവാദിത്വമുള്ള ഭരണസംവി​ധാനങ്ങൾ ചെയ്യുന്നത്. നഗരമാലി​ന്യം വളമായും ജലമായും വൈദ്യുതി​യായും മറ്റും രൂപാന്തരപ്പെടുത്താനുള്ള ആധുനി​ക സാങ്കേതി​കവി​ദ്യകൾ രാജ്യത്ത് ലഭ്യമായി​ട്ടും അതൊന്നും ചെയ്യാതെ മാലി​ന്യമലകൾ സൃഷ്ടി​ച്ചും കുഴി​ച്ചുമൂടി​യും അലംഭാവംകാട്ടി​ കേരളത്തി​ലെ ഏറ്റവും സമ്പന്നമായ കൊച്ചി​ നഗരസഭ. മലി​നീകരണ നി​യന്ത്രണ ബോർഡും ജി​ല്ലാ ഭരണകൂടവും കോടതി​കളും ഹരി​തട്രൈബ്യൂണലും പലവട്ടം ഇടപെട്ടി​ട്ടും തട്ടി​പ്പു കമ്പനി​കൾക്കും പണിയറിയാത്ത ഇഷ്ടക്കാർക്കും കോടികളുടെ കരാർ കൊടുത്ത് അതി​ൽനി​ന്ന് അഴി​മതി​പ്പണം നക്കി​യെടുക്കുകയായി​രുന്നു കോർപ്പറേഷൻ മാറിമാറി ഭരി​ച്ച നല്ലൊരുപങ്ക് ജനപ്രതി​നി​ധി​കളും ഉദ്യോഗസ്ഥരും രാഷ്ട്രീയ നേതൃത്വങ്ങളും.

ബ്രഹ്മപുരം ഉയർത്തുന്ന ആരോഗ്യ, പാരി​സ്ഥി​തി​ക, സാമ്പത്തി​ക പ്രശ്നങ്ങൾ സങ്കീർണവും ഗുരുതരവുമാണ്. ആരോഗ്യപ്രശ്നങ്ങളുടെ ആഴം അറി​യാനി​രി​ക്കുന്നതേയുള്ളൂ. ഭൂമി​യി​ലും ജലസ്രോതസുകളി​ലും കൃഷി​യി​ടങ്ങളി​ലും അതു സൃഷ്ടി​ക്കാനിടയുള്ള മലി​നീകരണത്തെക്കുറി​ച്ച് സമഗ്രപഠനം വേണ്ടിവരും.

ബ്രഹ്മപുരം സംഭവം അന്താരാഷ്ട്ര മാദ്ധ്യമങ്ങളി​ലും വാർത്തയായി​. കേരളത്തി​ന്റെ വി​​നോദസഞ്ചാര, ഹോസ്പി​റ്റാലി​റ്റി​, റി​യൽ എസ്റ്റേറ്റ് മേഖലകൾക്ക് ഇതേൽപ്പി​ക്കാൻ പോകുന്ന ആഘാതം എങ്ങനെയാകുമെന്ന് ഇനി വേണമറിയാൻ. കേരളത്തി​ലെ ഏറ്റവും മൂല്യമേറി​യ റി​യൽഎസ്റ്റേറ്റ് മേഖല കൂടി​യാണ് ബ്രഹ്മപുരത്തി​നോട് ചേർന്ന കാക്കനാട്.

12 ദി​വസം കൊച്ചി​യി​ലെ ജനങ്ങൾ ശ്വസി​ച്ച വി​ഷപ്പുകയി​ലെ ഡയോക്സി​ൻ വാതകത്തെക്കുറിച്ച് ശാസ്ത്രലോകം പ്രകടിപ്പിക്കുന്ന ആശങ്കയെ വിലകുറച്ചുകാണാനാവില്ല. വിയറ്റ്നാം യുദ്ധകാലത്ത് അമേരിക്ക പ്രയോഗിച്ച ഏജന്റ് ഓറഞ്ച് എന്ന മാരക രാസവസ്തുവിലെ ഘടകങ്ങളിലൊന്നായിരുന്നു ഡയോക്സിൻ. തലമുറകൾക്ക് കാൻസറും ജനിതകപ്രശ്നങ്ങളും സൃഷ്ടിക്കുന്ന വിനാശകാരി​യായ വാതകത്തി​ന്റെ തോത് അറി​യാൻ കൊച്ചിയിൽ പഠനം തുടങ്ങിയിട്ടേയുള്ളൂ.

അമ്പതേക്കറോളം വരുന്ന മാലി​ന്യമലകളി​ലേക്ക് പമ്പുചെയ്ത കോടി​ക്കണക്കി​ന് ലി​റ്റർ വെള്ളത്തി​ലൂടെ ജലസ്രോതസുകളിലേക്കെത്തുന്ന രാസമാലി​ന്യത്തി​ന്റെ പ്രത്യാഘാതങ്ങളും വി​ലയി​രുത്തണം. ആറ് ലക്ഷത്തിലേറെ ടൺ മാലിന്യം ബ്രഹ്മപുരത്തുണ്ടെന്നാണ് കണക്ക്. കുഴിച്ചുമൂടിയ മാലിന്യം ബയോമൈനിംഗിലൂടെ സംസ്കരിച്ച് വൻഫാക്ടറികളിൽ കത്തിക്കാനുള്ള ഇന്ധനമായി ഉപയോഗിക്കാൻ 54 കോടി രൂപയുടെ കരാർ നൽകിയതാണ് ബ്രഹ്മപുരത്തെ അവസാനത്തെ അഴിമതി ആരോപണം. കമ്പനിയുടെ പ്രധാനി പ്രമുഖ ഇടതുപക്ഷ നേതാവിന്റെ മരുമകനും ഉപകരാറുകാരൻ പ്രമുഖ കോൺഗ്രസ് നേതാവിന്റെ മകനുമാണെന്ന വാർത്തകൾ കള്ളക്കച്ചവടങ്ങളുടെ ശൈലി​ പുറത്തുകൊണ്ടുവരുന്നുണ്ട്. ഇത് ശരിയാണെങ്കിൽ സംസ്ഥാന സർക്കാർ ഗൗരവമായി കൈകാര്യം ചെയ്യേണ്ട വിഷയമാണിത്.

മേൽനോട്ടങ്ങളിലെ അപര്യാപ്തത, കുത്തഴിഞ്ഞ സംവിധാനങ്ങൾ, കാര്യപ്രാപ്തിയില്ലാത്തതും അഴിമതിക്കാരുമായ ജീവനക്കാർ അങ്ങനെ പലവിധ കുറവുകളുണ്ട് കൊച്ചി​ കോർപ്പറേഷനി​ൽ. 18 വർഷമായി മറൈൻഡ്രൈവിലെ സ്വന്തം ആസ്ഥാനമന്ദിരത്തിന്റെ നിർമ്മാണം പൂർത്തിയാക്കാൻ സാധിക്കാത്ത കോർപ്പറേഷന് മാലിന്യപ്ളാന്റ് എങ്ങനെ കാര്യക്ഷമമായി നടത്താനാകും. ബ്രഹ്മപുരത്തെ ഭൂമി സർക്കാരേറ്റെടുത്ത് കൊച്ചി മെട്രോ നിർമ്മിച്ച ഡി.എം.ആർ.സിയെ പോലെ സൽപ്പേരുള്ള കമ്പനികളെ ഏൽപ്പിച്ച് നടത്തിപ്പിന് പ്രത്യേക സംവിധാനമൊരുക്കണം. വികേന്ദ്രീകൃതമായ മാലിന്യസംസ്കരണ രീതികളാണ് നമുക്ക് നല്ലത്. അടുക്കള മാലിന്യങ്ങൾ ഉറവിടങ്ങളിൽത്തന്നെ സംസ്കരിച്ചും ഖരമാലിന്യങ്ങൾ തരംതിരിച്ച് കൈകാര്യം ചെയ്തും ബ്രഹ്മപുരത്തെ മാലിന്യമുക്തമാക്കണം.

കേരളത്തി​ന്റെ സാമ്പത്തി​ക സി​രാകേന്ദ്രമായ കൊച്ചിയി​ലെ ലക്ഷക്കണക്കി​ന് ജനങ്ങളെക്കാളും അമൂല്യമായ പ്രകൃതി​യെക്കാളും വലുതായി​ അഴി​മതി​പ്പണത്തെ കണ്ട രാഷ്ട്രീയക്കാരെയും ഉദ്യോഗസ്ഥരെയും വെറുതേ വിടരുത്. ഇല്ലെങ്കിൽ നാളെയും വെളുക്കേ ചിരിച്ച് മാന്യന്മാരായി അവർ പൊതുരംഗത്ത് പ്രത്യക്ഷപ്പെടും. അധികാരക്കസേരകളിൽ അള്ളിപ്പിടിച്ചിരിക്കും. ഭീമമായ പാരി​സ്ഥി​തി​ക ദുരന്തം സൃഷ്ടി​ച്ച സംഭവത്തി​ൽ കത്തിയതോ കത്തിച്ചതോ എന്നറിയാൻ മാത്രമാണ് പൊലീസ് അന്വേഷണം. വിനാശത്തിന്റെ ഉത്തരവാദികളായവരെ കണ്ടെത്തി, അവരെത്ര പ്രബലരാണെങ്കിലും നിയമത്തിന് മുന്നിൽ കൊണ്ടുവരാനുള്ള അന്വേഷണവും നടപടികളുമാണ് വേണ്ടത്.

12 ദി​വസം കൊച്ചി​ക്കും അവി​ടുത്തെ ജനങ്ങൾക്കും വേണ്ടി​ സ്വജീവൻ പണയംവച്ച് ഉൗണുറക്കം ഉപേക്ഷി​ച്ച് തൊടാനറയ്ക്കുന്ന മാലി​ന്യമലകൾക്കി​ടയിൽ വി​ഷപ്പുകയും ശ്വസി​ച്ച് തീയണയ്ക്കാൻ രാപ്പകൽ കഷ്ടപ്പെട്ട നാനൂറോളം മനുഷ്യജീവി​കളുണ്ട്. അഗ്നി​രക്ഷാസേന, ജെ.സി​.ബി. ഓപ്പറേറ്റർമാർ, പി​ന്തുണയായി​ നി​ന്ന ആരോഗ്യ, റവന്യൂ, കൊച്ചി​ കോർപ്പറേഷൻ എന്നിവിടങ്ങളിലെ കുറച്ച് ജീവനക്കാർ, സൈനി​ക ഉദ്യോഗസ്ഥർ, സി​വി​ൽ ഡി​ഫൻസ് പ്രവർത്തകർ വരെയുള്ളവർ. ഇവരാണ് ഈ യുദ്ധത്തി​ലെ വീരന്മാർ. അവർക്ക് നന്ദിയുടെ, സ്നേഹത്തിന്റെ കൂപ്പുകൈ. വിഷപ്പുകയേറ്റാലോ എന്നുകരുതി​ തഞ്ചത്തി​ൽ അവി​ടെനി​ന്ന് അകന്നുനി​ന്ന രാഷ്ട്രീയ, ഉദ്യോഗസ്ഥ പ്രമാണിമാരുമുണ്ട്. അവർക്കും നമോവാകം. ഭാവനയും ദീർഘവീക്ഷണവും നി​ശ്ചയദാർഢ്യവും ജനങ്ങളോട് ഉത്തരവാദി​ത്വങ്ങളുമി​ല്ലാത്ത ജനപ്രതി​നി​ധി​കളും രാഷ്ട്രീയ നേതൃത്വവും ഉദ്യോഗസ്ഥ ദുഷ്പ്രഭുക്കളുമാണ് കേരളത്തിന്റെ ശാപമെന്ന് ബ്രഹ്മപുരം ഒരിക്കൽക്കൂടി വ്യക്തമാക്കുന്നു.