ഒരു കാറ്റടിച്ചപ്പോൾ എല്ലാം കെെയിന്ന് പോയി, ശരീരം പൊത്തിപ്പിടിച്ച് നടി; വിവാദമായതോടെ മറുപടി ഇങ്ങനെ  

നടിയും റിയാലിറ്റി ഷോ താരവുമായ ഖുഷി മുഖർജിയാണ് ഇപ്പോൾ സോഷ്യൽ മീഡിയയിലെ പ്രധാന ചർച്ച വിഷയം. കഴിഞ്ഞ ദിവസം ഖുഷി ധരിച്ച വസ്ത്രമാണ് അതിന് കാരണം. ബ്ലാക്ക് ഗൗൺ പോലുള്ള ഒരു വസ്ത്രം ധരിച്ച് ഖുഷി നടന്ന് പോകുന്ന ദൃശ്യങ്ങൾ അടുത്തിടെ സോഷ്യൽ മീഡിയയിൽ പ്രചരിച്ചിരുന്നു. ശരീരഭാഗം മുഴുവൻ കാണാൻ പറ്റുന്ന വസ്ത്രം ധരിച്ചാണ് ഖുഷി എത്തിയത്.

പാപ്പരാസികൾ ചുറ്റും കൂടിയതോടെ രണ്ട് കെെകളും കൊണ്ട് ശരീരഭാഗങ്ങൾ പൊത്തിപ്പിടിച്ചുകൊണ്ട് നടക്കാൻ പോലും ബുദ്ധിമുട്ടുന്ന ഖുഷിയെ വീഡിയോയിൽ കാണാം. ഇതേതുടർന്ന് വലിയ വിമ‌ർശനവും നടി നേരിട്ടു. എന്നാൽ തന്റെ വസ്ത്രധാരണത്തെ ന്യായീകരിച്ച് രംഗത്തെത്തിയിരിക്കുകയാണ് ഇപ്പോൾ താരം. ഹോളിവുഡ് നടിമാരുടെയും മോഡലുകളുടെയും ഫാഷനാണ് ഞാൻ പിന്തുടരുന്നതെന്നും തനിക്ക് ഇഷ്ടമുള്ള വസ്ത്രം ധരിക്കാൻ അവകാശമുണ്ടെന്നും ഖുഷി ഇൻസ്റ്റഗ്രാമിൽ കുറിച്ചു.

'ഇതുവരെ ഞാൻ നിശബ്ദയായി ഇരിക്കാൻ ആഗ്രഹിക്കുകയായിരുന്നു. എന്നാൽ എല്ലാവരുടെയും വിരലുകൾ എന്റെ നേർക്ക് നീളുന്നത് കണ്ടു. നിങ്ങളിൽ പലരും എന്നെ പിന്തുണച്ചിട്ടുണ്ട്. അത് ഞാൻ മറക്കില്ല. സോഷ്യൽ മീഡിയയിൽ ഒരാളെ അധിക്ഷേപിക്കാനും ട്രോൾ ചെയ്യാനും വളരെ എളുപ്പമാണ്. ഇതൊക്കെ ഒരു ഫാഷനാണോ, ഇതൊരു മോശം പ്രവണതയല്ലേ എന്ന് എല്ലാവരും ചോദിക്കുന്നു. എനിക്ക് പറയാനുള്ളത് ധെെര്യത്തോടെ കാര്യങ്ങൾ ചെയ്യാൻ ആഗ്രഹിക്കുന്ന ഒരു വ്യക്തിയാണ് ഞാൻ. വെല്ലുവിളികൾ നിറഞ്ഞ തീരുമാനങ്ങൾ എടുക്കാൻ ഞാൻ ഇഷ്ടപ്പെടുന്നു. ചിലപ്പോൾ ഇത് നല്ലതായിരിക്കും ചിലപ്പോൾ പരാജയപ്പെടും.

പക്ഷേ എനിക്ക് ഇഷ്ടമുള്ളത് ധരിച്ചതിന് ഞാൻ ഖേദം പ്രകടിപ്പിക്കില്ല. എന്റെ എല്ലാ വസ്ത്രങ്ങളും ഹോളിവുഡ് നടിമാരിൽ നിന്നും ഇൻഫ്ലുവൻസർമാരിൽ നിന്നും മോഡലുകളിൽ നിന്നും പ്രചോദനം ഉൾക്കൊണ്ടതാണ്. ഞാൻ ധരിക്കുന്ന വസ്ത്രങ്ങൾ വിലക്കേർപ്പെടുത്താൻ താലിബാൻ ഭരിക്കുന്ന രാജ്യമല്ലിത്. എനിക്ക് ഹോളിവുഡ് മോഡലുകളുടെ ശരീരഘടനയില്ലായിരിക്കാം, എന്നുകരുതി എനിക്ക് ഇഷ്ടമുള്ളത് ധരിക്കാൻ അവകാശമുണ്ട്. നിങ്ങളുടെ നിറമോ ശരീരഘടനയോ രൂപഭംഗിയോ ഒന്നും പ്രശ്നമല്ല. നിങ്ങൾക്ക് ഇഷ്ടമുള്ളത് ചെയ്യുക. എന്നാണ് എനിക്ക് എല്ലാവരോടും പറയാനുള്ളത്'- ഖുഷി കുറിച്ചു.