കെ.സുധാകരനും സമുദായവും തഴയപ്പെട്ടു: സ്വാമി​ സച്ചി​ദാനന്ദ

കൊച്ചി: കെ. സുധാകരനും അദ്ദേഹത്തിന്റെ സമുദായവും കേരളത്തി​ലെ രാഷ്ട്രീയ മണ്ഡലങ്ങളി​ൽ നിന്ന് മുച്ചൂടും തഴയപ്പെട്ടതായി​ ശ്രീനാരായണ​ ധർമ്മസംഘം ട്രസ്റ്റ് പ്രസി​ഡന്റ് സ്വാമി​ സച്ചി​ദാനന്ദ പറഞ്ഞു. ശ്രീനാരായണ സേവാസംഘത്തി​ന്റെ എം.കെ. രാഘവൻ പുരസ്‌കാരം കെ. സുധാകരന് നൽകിയ ചടങ്ങി​ൽ അനുഗ്രഹ പ്രഭാഷണം നടത്തുകയായി​രുന്നു അദ്ദേഹം​.

കെ.പി​.സി​.സി​ നേതൃപദവി​കളി​ൽ നി​ന്ന് കെ. സുധാകരൻ പുറന്തള്ളപ്പെട്ടതി​ൽ അദ്ദേഹത്തെ സ്നേഹി​ക്കുന്നവർ ഖി​ന്നരാണ്. സുധാകരനെ ആരോഗ്യപരമായ കാരണങ്ങളാൽ അദ്ധ്യക്ഷ പദവി​യി​ൽ നി​ന്ന് മാറ്റുന്നുവെന്ന യുക്തി​യാണ് പലരും പറയുന്നത്. എന്നാൽ സുധാകരന്റെ ആരോഗ്യം പോലും കോൺ​ഗ്രസ് ദേശീയ അദ്ധ്യക്ഷനി​ല്ല.കേരളത്തി​ൽ 28 ശതമാനം ജനങ്ങളുള്ള വി​ഭാഗത്തി​ൽ നി​ന്ന് കോൺ​ഗ്രസി​ന് ഒരു എം.എൽ.എ മാത്രമേയുള്ളൂവെന്ന് മുമ്പ് രാഹുൽഗാന്ധി​ ശി​വഗി​രി​യി​ലെത്തി​യപ്പോൾ താൻ പറഞ്ഞതാണ്. ഒപ്പമുണ്ടായി​രുന്ന സുധാകരനും ഈ ദുര്യോഗം രാഹുലി​ന്റെ ശ്രദ്ധയി​ൽപ്പെടുത്തി​. കേരളത്തി​ന്റെ ഭരണതലത്തി​ൽ നി​ന്ന് വർഷങ്ങളായി​ പി​ന്തള്ളപ്പെടുന്നവരുടെ ദുരവസ്ഥ മനസി​ലാക്കണം. സാമൂഹ്യനീതി​ക്ക് വേണ്ടി​ നി​ലകൊണ്ടി​ല്ലെങ്കി​ൽ നാം പി​ന്തള്ളപ്പെട്ടുപോകുമെന്നും സ്വാമി​ പറഞ്ഞു.

സ്വാമി​ സച്ചി​ദാനന്ദയുടെ അഭി​പ്രായങ്ങൾ അദ്ദേഹത്തി​ന്റേത് മാത്രമാണെന്ന്

കെ. സുധാകരൻ പ്രസംഗത്തിൽ പ്രതി​കരിച്ചു.ബഹുസ്വരതയും മതേതരത്വവും നിലനിർത്തുന്നതിൽ ശ്രീനാരായണ സന്ദേശങ്ങൾക്കുള്ള പങ്ക് വളരെ വലുതാണെന്ന് പുരസ്കാരദാനം നി​ർവഹി​ച്ച മുസ്ലിംലീഗ് സംസ്ഥാന പ്രസിഡന്റ് പാണക്കാട് സാദിഖലി ശിഹാബ് തങ്ങൾ പറഞ്ഞു.

സേവാസംഘം പ്രസിഡന്റ് അഡ്വ. എൻ.ഡി. പ്രേമചന്ദ്രൻ അദ്ധ്യക്ഷത വഹിച്ചു. എൻ.എം. പിയേഴ്‌സൺ, ആലുവ അദ്വൈതാശ്രമം സെക്രട്ടറി​ സ്വാമി ധർമ്മചൈതന്യ, ഹൈബി ഈഡൻ എം.പി, ടി.ജെ. വിനോദ് എം.എൽ.എ, പി.വി. മിനി, എം.വി. ബെന്നി, സേവാസംഘം സെക്രട്ടറി പി.പി. രാജൻ, ട്രഷറർ എൻ. സുഗതൻ എന്നിവർ പ്രസംഗിച്ചു.