വർദ്ധിപ്പിക്കാൻ പോകുന്നത് മൂന്ന് മുതൽ 46 രൂപ വരെ; 13 സാധനങ്ങളുടെ വില കുത്തനെ ഉയർത്തി സപ്ലൈകോ

തിരുവനന്തപുരം: സംസ്ഥാനത്തെ സപ്ലൈകോയിൽ 13 ആവശ്യസാധനങ്ങളുടെ വില കുത്തനെ ഉയർത്താൻ നീക്കം. പൊതുവിപണിയിലെ ആവശ്യസാധനങ്ങളുടെ വിലവർദ്ധനവിനിടെയും സാധാരണ ജനങ്ങൾ ഒന്നടങ്കം ആശ്രയം തേടുന്നത് സപ്ലൈകോയിലാണ്. ഇതിനിടെയാണ് പുതിയ നീക്കം. എന്നാൽ സാധനങ്ങൾക്ക് പൊതു വിപണിയിൽ എന്താണോ വില അതിനേക്കാൾ 35 ശതമാനം കുറവായിരിക്കും ഇനി മുതൽ സപ്ലൈകോയിലെ വില. 70 ശതമാനമുണ്ടായിരുന്ന സാധനങ്ങളുടെ സബ്‌സിഡി 35 ശതമാനമാക്കിയാണ് കുറച്ചത്‌.

ചെറുപയർ, ഉഴുന്ന്, വൻപയർ, കടല, തുവര പരിപ്പ്, മുളക്, മല്ലി, പഞ്ചസാര, വെളിച്ചെണ്ണ, അരി തുടങ്ങിയവയുടെ വിലയാണ് വ‌ദ്ധിക്കാൻ പോകുന്നത്. പലതിനും മൂന്ന് രൂപ മുതൽ 46 രൂപയിലധികം വിലവർദ്ധനയുണ്ട്. ഏറ്റവും കൂടുതൽ വില ഉയർന്നിരിക്കുന്നത് തുവര പരിപ്പിനാണ്. 46 രൂപയാണ് വില കൂടിയത്. ഏറ്റും കുറവ് വില വർദ്ധിച്ചിരിക്കുന്നത് പച്ചരിക്കാണ്. മൂന്ന് രൂപയാണ് കൂടിയത്.

അതേസമയം, മലയാളികൾ സാധാരണയായി ഉപയോഗിച്ചുവരുന്ന അരിയിനങ്ങളായ ജയ, മട്ട, കുറുവ എന്നിവയ്ക്കും സപ്ലൈകോയിൽ വില ഉയർന്നിട്ടുണ്ട്. ജയയ്ക്ക് നാല് രൂപയും മട്ടയ്ക്കും കുറുവയ്ക്കും അഞ്ച് രൂപ വീതവും കൂടിയിട്ടുണ്ട്.

വിലവിവരം (പുതിയ വില)

ചെറുപയർ - 93 രൂപ

ഉഴുന്ന് - 95 രൂപ

വൻകടല - 70 രൂപ

വൻപരിപ്പ്- 76 രൂപ

തുവര - 111 രൂപ

മുളക് - 82 രൂപ

മല്ലി - 39 രൂപ

പഞ്ചസാര - 28 രൂപ

വെളിച്ചെണ്ണ - 55 രൂപ

ജയ അരി - 29 രൂപ

മട്ട അരി - 30 രൂപ

പച്ചരി - 26 രൂപ

2016-ന് ശേഷം ഇതാദ്യമായാണ് സപ്ലൈകോ സാധനങ്ങളുടെ വില വർദ്ധിപ്പിക്കുന്നത്. സപ്ലൈകോയിൽ വില വർദ്ധിപ്പിക്കാനുള്ള തീരുമാനത്തിന് മുൻപ് തന്നെ ഇടതുപക്ഷം പച്ചക്കൊടി കാട്ടിയിരുന്നു. നിലവിലെ രീതിയിൽ മുന്നോട്ട് പോകാനാകില്ലെന്ന് സപ്ലൈകോ കടുത്ത നിലപാട് സ്വീകരിച്ചതോടെയാണ് സിവിൽ സപ്ലൈസ് വകുപ്പ് വിലവർദ്ധിപ്പിക്കുന്നതിന് നിർബന്ധിതമായത്. വിലവർദ്ധനവിനെ തുടർന്ന് പൊതുജനത്തിന്റെ ഭാഗത്ത് നിന്ന് വലിയ പ്രതിഷേധമാണ് ഉയരുന്നത്.