അറിവിന്റെ പുത്തൻ ലോകത്തേക്ക് 'ഇരട്ട' സംഘം

മാന്നാർ: പുത്തൻ ഉടുപ്പും ബാഗും കുടയും വാട്ടർ ബോട്ടിലുമൊക്കെയായി പുതിയ കൂട്ടുകാരൊത്ത് അറിവിന്റെ പുതിയ ലോകത്തേക്ക് പിച്ചവയ്കുന്ന സന്തോഷത്തിലാണ് നാലു വയസുകാരായ ഇരട്ട സഹോദരങ്ങൾ,​ ഋഷിയും ഋതുവും പിന്നെ മുഹമ്മദ് അലിയും അഹമ്മദ് അലിയും. നാലു പേരും എൽ.കെ.ജിയിലേക്കാണ് പ്രവേശനം നേടിയത്. മാന്നാർ ഗ്രാമ പഞ്ചായത്ത് പത്താം വാർഡ് കുട്ടമ്പേരൂർ മേൽത്തറയിൽ രഞ്ജിത്ത്- സുചിത്ര ദമ്പതികളുടെ മക്കളാണ് ഋഷി രഞ്ജിത്തും ഋതു രഞ്ജിത്തും. കുട്ടമ്പേരൂർ മുട്ടേൽ എം.ഡി.എൽ.പി സ്കൂളാണ് ഇരുവർക്കുമായി അറിവിന്റെ പുതിയ വാതായനം തുറക്കുന്നത്.

മാന്നാർ ഗ്രാമ പഞ്ചായത്ത് പതിനെട്ടാം വാർഡ് ഇരമത്തൂർ മേലേ മാടായിൽ ഷബീർ അലി - റെൻസിയ ദമ്പതികളുടെ ഇരട്ട മക്കളാണ് മുഹമ്മദ് അലിയും അഹമ്മദ് അലിയും. ചെന്നിത്തല സെന്റ ഗ്രിഗോറിയോസ് ഇംഗ്ലീഷ് മീഡിയം സ്കൂളിലേക്കാണ് ഈ ഇരട്ടകൾ പ്രവേശനം നേടിയത്. ഇവരെ സ്കൂളിലേക്ക് ഒരുക്കി യാത്രയാക്കാൻ മത്സരിക്കുകയാണ് ഇവരുടെ മൂത്ത സഹോദരങ്ങളായ ഒമ്പതാം ക്ലാസുകാരി ഇർഫാനയും ആറാം ക്ലാസുകാരി ഇഹ്സാനയും രണ്ടാം ക്ലാസുകാരി റൈഹാനയും.