രാമങ്കരി പഞ്ചായത്തിൽ മത്സരം പ്രവചനാതീതം

കുട്ടനാട്: എൽ.ഡി.എഫിലെ രണ്ട് പ്രബല പാർട്ടികൾ നേർക്കുനേർ ഏറ്റുമുട്ടുമ്പോൾ രാമങ്കരി ഗ്രാമപഞ്ചായത്തിൽ മത്സരം പ്രവചനാതീതമാകും. അടിയൊഴുക്കുകളാകും ഇവിടെ വിധി നിർണയിക്കുക. സീറ്റ് തർക്കം സംബന്ധിച്ച കാര്യത്തിൽ യോജിപ്പിലെത്താൻ കഴിയാതിരുന്നതോടെയാണ് പഞ്ചായത്തിൽ സി.പി.എമ്മും സി.പി.ഐയും സ്വന്തം സ്ഥാനാർത്ഥികളെ മത്സരരംഗത്തിറക്കിയത്. എൽ.ഡി.എഫിലെ ചേരിതിരിവ് തങ്ങൾക്ക് അനുകൂലമാകുമെന്ന ആത്മവിശ്വാസത്തിലാണ് യു.ഡി.എഫും എൻ.ഡി.എയും.

രണ്ടാം വാർഡിൽ എൽ.ഡി എഫ്, യു.ഡി.എഫ്, ബി.ജെ.പി സ്ഥാനാർത്ഥികൾക്ക് പുറമേ രണ്ട് സ്വതന്ത്രരും രംഗത്തുണ്ട്. മുൻകാലങ്ങളിൽ യു.ഡി.എഫിനെ പിന്തുണച്ചിട്ടുള്ള വോട്ടർമാർ ഇക്കുറി ആരെ പിന്തുണയ്ക്കുമെന്നത് പ്രധാനചർച്ചയാണ്. വാർഡ് എട്ടിൽ സി.പി.എം സ്ഥാനാർത്ഥിയായ അശോകനെതിരെ മുൻപഞ്ചായത്തംഗമായ രമ്യാ സജീവിനെ തങ്ങളുടെ സ്വതന്ത്ര സ്ഥാനാർത്ഥിയായാണ് സി.പി.ഐ മത്സരത്തിനിറക്കിയിട്ടുള്ളത്. ഇതുകൂടാതെ 5, 6,4,13,14 വാർഡുകളിലും സി.പി.എമ്മും സി.പി.ഐയും നേരിട്ട് ഏറ്റുമുട്ടുന്ന സ്ഥിതിയാണ്. കഴിഞ്ഞ 25വർഷമായി എൽ.ഡി.എഫ് ഭരിച്ചിരുന്ന രാമങ്കരി പഞ്ചായത്ത് ഇത്തവണ ആരോടൊപ്പം നിൽക്കുമെന്നതാണ് എല്ലാവരും ഉറ്റുനോക്കുന്നത്.