ഭക്തിയുടെ നിറവിൽ മാടായി തിരുവർക്കാട്ട് ഭഗവതിക്ക് മകരപൊങ്കാല.

പഴയങ്ങാടി:ഭക്തിയുടെ നിറവിൽ മാടായി തിരുവർക്കാട്ട് കാവിൽ ഭക്തിയുടെ നിറവിൽ മകര പൊങ്കാല ആഘോഷിച്ചു. മുക്കുവ,മുകയ സമുദായങ്ങളിൽ പെട്ടവരാണ് മകരം ഒൻപതിന്റെ പൊങ്കാല അർപ്പിക്കാൻ ക്ഷേത്രത്തിൽ എത്തുന്നത്.

നേരത്തെ തിരുവർകാട്ട് കാവിന് സമീപ പ്രദേശത്ത് താമസിച്ചിരുന്ന ഈ സമുദായാംഗങ്ങൾ പിന്നീട് നീലേശ്വരം,കാസർകോട് ഭാഗത്തേക്ക് താമസം മാറി. മാടായി ,മുട്ടം, കാര തറവാട് അംഗങ്ങളാണ് പ്രധാനമായും പൊങ്കാല സമർപ്പണത്തിന് മാടായിക്കാവിൽ എത്തുന്നത്. കടവത്ത് തറവാട് അംഗങ്ങളാണ് ഇവർക്ക് ആവശ്യമായ കുടിവെള്ളവും നൽകുന്നത്.

പൊങ്കാലയ്ക്ക് ആവശ്യമായ അരിയും ഇവ ഭാഗം ചെയ്യുന്നതിന് ആവശ്യമായ കലവുമായി ഇരു സമുദായാംഗങ്ങളും മാടായിക്കാവിൽ എത്തുന്നു. ക്ഷേത്രത്തിന് അകത്ത് പാകം ചെയ്ത നിവേദ്യം ഇവർക്ക് നൽകുന്നതാണ് പതിവ്. ഭക്തിനിർഭരമായ മകര പൊങ്കാല സമർപ്പണത്തിന് ഇക്കുറി നൂറുകണക്കിന് ഭക്തജനങ്ങളാണ് എത്തിച്ചേർന്നത്.