ആറ് മാസം, ജില്ലയിൽ 53 മുങ്ങിമരണം

കൊല്ലം: ജില്ലയിലെ ജലാശയങ്ങളിൽ ആറുമാസത്തിനിടെ മുങ്ങിമരിച്ചത് 53 പേർ. നീന്തൽ അറി​യി​ല്ലെങ്കി​ലും കുളി​ക്കാൻ ഇറങ്ങി​യവരും അപകടത്തി​ൽപ്പെട്ടവരെ രക്ഷി​ക്കാൻ ശ്രമി​ച്ചവരുമാണ് മരണത്തി​ന് കീഴടങ്ങി​യത്. സ്കൂൾ, കോളേജ് വി​ദ്യാർത്ഥി​കൾ അടക്കം ദുരന്തത്തി​ൽപ്പെട്ടു.

കാൽ വഴുതി അപകടത്തിൽപ്പെടുന്നവരുടെ എണ്ണവും കൂടുതലാണ്. അശ്രദ്ധയാണ് ഒട്ടുമി​ക്ക മരണങ്ങൾക്കും പി​ന്നി​ലെന്ന് ഫയർഫോഴ്സ് ഉദ്യോഗസ്ഥർ പറയുന്നു. ബന്ധുവീടുകളി​ലെത്തുന്ന കൗമാരക്കാരും സുഹൃത്തുക്കൾക്കൊപ്പം ജലാശയങ്ങളി​ൽ കുളി​ക്കാനെത്തുന്നവരും അപകടങ്ങൾക്കി​രയാവുന്നു. വി​നോദ യാത്രയ്ക്കി​ടെ മദ്യലഹരി​യി​ലും മറ്റും ജലാശയങ്ങളി​ൽ ഇറങ്ങി​ മരണത്തി​നി​രയായ യുവാക്കളുമുണ്ട്.

നീന്തൽ പാഠ്യപദ്ധതിയിൽ ഉൾപ്പെടുത്തിയിട്ട് അധികനാളായി​ല്ല. ഏറെ നാളത്തെ പ്രധിഷേധങ്ങൾക്കൊടുവിലാണ് നീന്തൽ പഠന ഭാഗമായത്. എന്നാൽ വിരലിലെണ്ണാവുന്ന സ്കൂളുകളിൽ മാത്രമാണ് പദ്ധതി നടപ്പാക്കി​യത്. കായിക അദ്ധ്യാപകർക്ക് വേണ്ടിയുള്ള നീന്തൽ പരിശീലനം പുരോഗമിക്കുകയാണ്.

പാറക്കുളങ്ങൾ ഭീഷണി​

മഴക്കാലമെന്നോ വേനലെന്നോ വ്യത്യാസമില്ലാതെ, ജില്ലയിലെ നൂറുകണക്കിന് പാറമടകളാണ് വെള്ളം നിറഞ്ഞുകിടക്കുന്നത്. ഒട്ടുമി​ക്ക പാറമടകൾക്കും സംരക്ഷണവേലിയില്ല. മുങ്ങിമരണങ്ങളിൽ ഏറിയ പങ്കും പാറക്കുളങ്ങളിലാണ്. പുറമേ ശാന്തമായി കാണപ്പെടുന്ന ഇവയുടെ ആഴം ഊഹി​ക്കാവുന്നതി​ലും അപ്പുറമായി​രി​ക്കും. ഇതേപ്പറ്റി​ ധാരണയി​ല്ലാതെ ഇറങ്ങുന്നവരാണ് അപകടത്തി​ൽപ്പെടുന്നത്.

സ്ഥലം-മുങ്ങിമരണം

(ഫയർഫോഴ്സ് റിപ്പോർട്ട്)

കൊല്ലം (കടപ്പാക്കട): 9

ചാമക്കട-5

കുണ്ടറ-8

കൊട്ടാരക്കര-4

കരുനാഗപ്പള്ളി-1

കടയ്ക്കൽ-6

ശാസ്താംകോട്ട-6

പത്തനാപുരം-4

പുനലൂർ-6

പരവൂർ-4

ജലാശയത്തെക്കുറിച്ച് വ്യക്തമായ അറിവില്ലാതെ ഇറങ്ങുന്നതാണ് അപകടം വിളിച്ചുവരുത്തുന്നത്. കരയിൽ നിന്ന് കാണുമ്പോൾ ആഴമോ ഒഴുക്കിന്റെ ശക്തിയോ അറിയാൻ കഴിയില്ല.

ഫയർ ഫോഴ്സ് അധികൃതർ