കടുത്ത പോരാട്ടം 6 ഡിവിഷനുകളിൽ

കോട്ടയം: ജില്ലാ പഞ്ചായത്തിലേയ്ക്കുള്ള ആറ് ഡിവിഷനുകളിലാണ് കടുത്ത പോരാട്ടം. വിജയം അഭിമാനമായതും അട്ടിമറിയുണ്ടാകുമെന്ന് കണക്കാക്കുന്നതും കൈവിടാതിരിക്കാൻ പെടാപ്പാടുപെടുന്നതുമായ ഡിവിഷനുകൾ.

കുമരകം, അതിരമ്പുഴ ,കുറവിലങ്ങാട് ,പൂഞ്ഞാർ, മുണ്ടക്കയം, കാഞ്ഞിരപ്പള്ളി എന്നിവിടങ്ങളാണത്. ഇടതുകോട്ടയായ കുമരകം സ്ഥാനാർത്ഥിയുടെ കരുത്തുകൊണ്ടാണ് ഇക്കുറി മാറിച്ചിന്തിക്കുമോയെന്ന ചർച്ച ഉയരുന്നത്. എൽ.ഡി.എഫിന് മേൽക്കൈയുള്ള കുറിച്ചിയെ വിറപ്പിച്ച് വെന്നിക്കൊടിപാറിച്ച പി.കെ.വൈശാഖന്ന യുവമുഖമാണ് കുമരകത്ത് യു.ഡി.എഫ് സ്ഥാനാർത്ഥി. സി.പി.എമ്മിനായി അഡ്വ. അഗ്രിസ് സദാശിവനും. മുൻ യൂത്ത് കോൺഗ്രസ് നേതാവ് ജിം അലക്സ് എൽ.ഡി.എഫ് സ്ഥാനാർത്ഥിയായതോടെയാണ് അതിരമ്പുഴയിലെ മത്സരഫലം പ്രവചനാതീതമാക്കുന്നത്. കഴിഞ്ഞതവണ യു.ഡി.എഫ് വിജയിച്ച മണ്ഡലത്തിൽ ഇത്തവണ കേരള കോൺഗ്രസ് ജില്ലാ പ്രസിഡന്റ് ജയ്സൺ ജോസഫ് ആണ് സ്ഥാനാർത്ഥി. രാഷ്ട്രീയ വോട്ടുകൾക്ക് പുറമേ വ്യക്തിപരമായി വോട്ട് സമ്പാദിക്കാനും കഴിവുള്ളവരാണ് ഇരുവരും.

ജോസ് - ജോസഫ് വിഭാഗം നേരിട്ട് പോരാടുന്ന കുറവിലങ്ങാട്ട് യു.ഡി.എഫ് സ്ഥാനാർത്ഥിയാകുന്നത് കാൽ നൂറ്റാണ്ടിലേറെയായി തോൽക്കാതെ മത്സരിക്കുന്ന ജോസ് മോൻ മുണ്ടയ്ക്കലാണ്. ഇതേ റെക്കാഡുള്ള പി.സി കുര്യനാണ് എൽ.ഡി.എഫ് സ്ഥാനാർത്ഥി. കഴിഞ്ഞതവണ സ്വതന്ത്രനായി ഷോൺ ജോർജ് മത്സരിച്ച് വിജയിച്ച പൂഞ്ഞാർ ശ്രദ്ധേയമാകുന്നത് ബി.ജെ.പിയ്ക്ക് സ്വാധീനം ഉറപ്പാക്കാൻ കഴിയുമോയെന്നതിലാണ്. വിജയിക്കുകയോ വിജയത്തിന്റെ സമീപത്തെത്തുകുയോ ചെയ്യേണ്ടത് ഷോണിനും അഭിമാന പ്രശ്നമാണ്. ജനകീയരായ രണ്ട് പേർ മത്സരിക്കുന്നതാണ് മുണ്ടക്കയത്തെ ശ്രദ്ധാകേന്ദ്രമാക്കുന്നത്. കോൺഗ്രസിലെ അഡ്വ.പി.ജീരാജും, സി.പി.എമ്മിലെ അഡ്വ.കെ.രാജേഷും കരുത്തരാണ്. കേരള കോൺഗ്രസുകൾ ഏറ്റുമുട്ടുന്ന കാഞ്ഞിരപ്പള്ളിയിലെ ഫലവും മുന്നണികൾക്ക് നിർണായകമാണ്. യു.ഡി.എഫിന് വേണ്ടി മുൻ ജില്ലാ പഞ്ചായത്ത് പ്രസിഡന്റ് തോമസ് കുന്നപ്പള്ളി, എൽ.ഡി.എഫിന് വേണ്ടി മുൻ ബ്ലോക്ക് പഞ്ചായത്ത് പ്രസിഡണ്ട് ജോളി മടുക്കക്കുഴിയുമാണ് പോരാടുന്നത്. പുതിയതായി വന്ന തലനാട്ടിൽ വേരുറപ്പിക്കുകയെന്നത് ഇരുമുന്നണികൾക്കും നിർണായകമാണ്.