ചായയിൽ പുതുരുചികളുമായി ഈസ്‌റ്റ് ടീ

കൊച്ചി: ആരോഗ്യസംരക്ഷണത്തിന് ഊന്നൽ നൽകുകയും പുതുരുചികൾ തേടുന്നവരുമായ പുതുതലമുറയുടെ ജീവിതശൈലിക്ക് ഇണങ്ങിയ ഫ്ളേവറുകളുമായി നൂതന ചായശ്രേണി പുറത്തിറക്കി ഗ്രൂപ്പ് മീരാന്റെ ഭാഗമായ ഈസ്‌റ്റ്ടീ. ഇഞ്ചിയുടെയും ഏലത്തിന്റെയും ഫ്ളേവറുകൾ ചേർന്ന ചായ, ഗ്രീൻ ടീ, അസാം ബ്ളെൻഡ് തേയില എന്നിവയാണ് അവതരിപ്പിച്ചത്.

കൊച്ചിയിൽ നടന്ന ചടങ്ങിൽ ഗ്രൂപ്പ് മീരാൻ ചെയർമാൻ നവാസ് മീരാൻ, ഡയറക്‌ടർ സുബിൻ മീരാൻ എന്നിവർ ചേർന്ന് പബ്ളിക് റിലേഷൻസ് കൗൺസിൽ ഒഫ് ഇന്ത്യ നാഷണൽ പ്രസിഡന്റ് ഡോ.ടി. വിനയ് കുമാറിന് കൈമാറി ടീ ബാഗുകളുടെ ശ്രേണി പുറത്തിറക്കി. മൂന്നുമാസത്തിലൊരിക്കൽ പുതിയശ്രേണികൾ അവതരിപ്പിക്കും. വെൽനസ് അധിഷ്ഠിത ശ്രേണിയിലെ ചായകൾ ഈമാസം അവസാനവും ഡിസംബറിലും അവതരിപ്പിക്കും. ജനുവരിയോടെ കോൾഡ് ചായ ശ്രേണിയും പുറത്തിറക്കുമെന്ന് നവാസ് മീരാൻ, സുബിൻ മീരാൻ എന്നിവർ പറഞ്ഞു. കേരളത്തിലും ആന്ധ്രയിലും ഗൾഫിലും പുതിയ ഉത്‌പന്നങ്ങൾ ലഭിക്കും. ഓൺലൈനിലും ലഭ്യമാണ്.