അർജന്റീന ടീമിന് മെസിയുടെ സമ്മാനം: 35 സ്വർണ ഐഫോണുകൾ

പാരീസ്: ഖത്തറിൽ ലോകകിരീടമുയർത്താൻ തനിക്കൊപ്പം നിന്ന അർജന്റീന ടീംമംഗങ്ങൾക്ക് സ്വർണ ഐ ഫോണുകൾ സമ്മാനമായി നൽകാനൊരുങ്ങി ലയണൽ മെസി. സഹാതാരങ്ങൾക്കും പരിശീലക സംഘാങ്ങൾക്കും നൽകാനായി 35 സ്വർണ ഐ ഫോണുകളാണ് മെസി ഓർഡർ ചെയ്തത്.24 കാരറ്റ് സ്വർണത്തിൽ തീർത്ത ഫോണുകൾക്കായി 175,​ 000 പൗണ്ടാണ് (ഏകദേശം ഒരു കോടി 72 ലക്ഷം ഇന്ത്യൻ രൂപ)​ മെസി ചെലവാക്കുന്നത്. ഓരോ കളിക്കാരന്റെയും പേരും ജേഴ്‌സി നമ്പറും അർജന്റീനയുടെ ലോഗോയും പതിപ്പിച്ച പ്രത്യേക ഐഫോണുകളാണിത്. ഫോണുകൾ പാരിസിൽ മെസിയുടെ താമസ സ്ഥലത്ത് എത്തിച്ചിട്ടുണ്ട്. ഐ ഡിസൈൻ ഗോൾഡ് എന്ന സ്ഥാപനമാണ് മെസിക്ക് വേണ്ടി സ്വർണ ഐഫോണുകൾ രൂപകല്പനചെയ്തത്.

ലോകകപ്പ് ഫൈനൽ കഴിഞ്ഞ് ഏതാനും ആഴ്ചകൾക്ക് ശേഷം മെസി ഞങ്ങളുമായി ബന്ധപ്പെട്ടു. ഈ ചരിത്ര വിജയം ആഘോഷിക്കാൻ എല്ലാ കളിക്കാർക്കും സ്റ്റാഫിനും എന്തെങ്കിലും ഒരു പ്രത്യേക സമ്മാനം നൽകാൻ ആഗ്രഹിക്കുന്നതായി അറിയിച്ചു. സാധാരണ ചെയ്യുന്നതു പോലെ വാച്ചുകൾ സമ്മാനമായി നൽകാൻ ഉദ്ദേശിക്കുന്നില്ലെന്നും വ്യക്തമാക്കി. അതിനാൽ അവരുടെ പേരുകളെഴുതിയ ചെയ്ത സ്വർണ ഐ ഫോണുകൾ നൽകാമെന്ന് ഞാൻ നിർദ്ദേശിക്കുകയായിരുന്നു. അദ്ദേഹത്തിന് ആ ആശയം ഇഷ്ടമായി.

- ഐ ഡിസൈന്‍ ഗോൾഡ് സി.ഇ.ഒ ബെൻ ലയൺസ്