ലണ്ടൻ : 76 -ാമത് ബാഫ്റ്റ ( ബ്രിട്ടീഷ് അക്കാഡമി ഫിലിം അവാർഡ്സ് ) പുരസ്കാരങ്ങൾ വിതരണം ചെയ്തു. മികച്ച ചിത്രം, സംവിധാനം, ഇംഗ്ലീഷ് ഇതര ചിത്രം ഉൾപ്പെടെ ഏഴ് പുരസ്കാരങ്ങൾ സ്വന്തമാക്കി ജർമ്മൻ ചിത്രമായ ' ഓൾ ക്വയറ്റ് ഓൺ ദ വെസ്റ്റേൺ ഫ്രണ്ട് " ആധിപത്യം നേടി. ഏറ്റവും കൂടുതൽ നോമിനേഷനുകളും ഈ ചിത്രത്തിനായിരുന്നു ( 14 ). നാല് പുരസ്കാരങ്ങളുമായി എൽവിസ്, ദ ബൻഷീസ് ഒഫ് ഇനിഷെറിൻ എന്നീ ചിത്രങ്ങൾ തൊട്ടുപിന്നിലെത്തി. റോക്ക് ആൻഡ് റോൾ ഇതിഹാസം എൽവിസ് പ്രെസ്‌ലിയുടെ ജീവിതത്തെ ആസ്പദമാക്കിയുള്ള ' എൽവിസി"ലെ അഭിനയത്തിന് ഓസ്റ്റിൻ ബട്‌ലറെ മികച്ച നടനായി തിരഞ്ഞെടുത്തു. ' ടാറി"ലെ അഭിനയത്തിന് കേറ്റ് ബ്ലാൻചറ്റ് മികച്ച നടിയായി. ഓൾ ക്വയറ്റ് ഓൺ ദ വെസ്റ്റേൺ ഫ്രണ്ടിലൂടെ എഡ്വേഡ് ബെർഗർ മികച്ച സംവിധാനത്തിനുള്ള പുരസ്കാരം നേടി. ദ ബൻഷീസ് ഒഫ് ഇനിഷെറിനിലെ അഭിനയത്തിന് കെറി കോൺഡോൺ മികച്ച സഹനടിയും ബാരി ക്യോഗൻ മികച്ച സഹനടനുമായി. ഡോക്യുമെന്ററി വിഭാഗത്തിൽ ഇന്ത്യയുടെ ഓൾ ദാറ്റ് ബ്രീത്ത്സിന് വിജയിക്കാനായില്ല. റഷ്യൻ പ്രതിപക്ഷ നേതാവ് അലക്സി നവാൽനിയെ പറ്റിയുള്ള ' നവാൽനി"യാണ് ഈ വിഭാഗത്തിൽ തിരഞ്ഞെടുക്കപ്പെട്ടത്. അവതാർ: ദ വേ ഒഫ് വാട്ടറിനാണ് മികച്ച സ്പെഷ്യൽ വിഷ്വൽ ഇഫക്ട് പുരസ്കാരം.