കേരള ട്വന്റി- ട്വന്റി ചെസ് ലീഗ് 6 മുതൽ തിരുവനന്തപുരത്ത്

തിരുവനന്തപുരം: പ്രഥമ കേരള ട്വന്റി- ട്വന്റി ചെസ് ലീഗ് സെപ്തംബർ 6,​7 തീയതികളിൽ തിരുവനന്തപുരം ജിമ്മി ജോർജ് സ്റ്റേഡിയത്തിൽ നടക്കും. യു.എസിലെ ഡെലാവെർ ആസ്ഥാനമായി പ്രവർത്തിക്കുന്ന പ്രീമിയർ ചെസ് അക്കാഡമിയാണ് കേരള പ്രീമിയർ ചെസ് ലീഗ് (കെ.പി.സി.എൽ) ടീം ടൂർണമെന്റ് സംഘടിപ്പിക്കുന്നത്.

6ന് ആറു റൗണ്ടുകളിലായി സ്വിസ് ലീഗ് സമ്പ്രദായത്തിൽ നടക്കുന്ന മത്സരങ്ങളിൽ നിന്ന് 4 സെമിഫൈനലിസ്റ്റുകളെ കണ്ടെത്തും. 7ന് സെമിഫൈനലുകളും ഫൈനലും. ഒന്നാം സമ്മാനമായ പത്തു ലക്ഷം രൂപ വീതം ഉൾപ്പെടെ ആകെ സമ്മാനമായി 25 ലക്ഷം രൂപ ലഭിക്കും.
ട്രിവാൻഡ്രം ടൈ​റ്റൻസ്, കൊല്ലം നൈയിട്ട്സ്, പത്തനംതിട്ട പയനീർസ്, കോട്ടയം കിംഗ്സ്, ഇടുക്കി ഇൻവിസിബിൾസ്, ആലപ്പുഴ ആർച്ചേഴ്സ്, എറണാകുളം ഈഗിൾസ്, തൃശൂർ തൻഡേർസ്, പാലക്കാട് പാന്തേഴ്സ്, മലപ്പുറം മാവെറിക്സ്, കോഴിക്കോഡ് കിംഗ്സ്ലയെർസ്, കണ്ണൂർ ക്രൂസെഡേസ്, വയനാട് വാരിയേഴ്സ്, കാസർഗോഡ് കോൺകറേഴ്സ്  എന്നി കെ.പി.സി.എൽ ടീമുകളാണ് മത്സരിക്കുന്നത്. പതിനാലു ടീമുകളിൽ മൂന്നെണ്ണത്തിൽ മാത്രമാണ് ഗ്രാൻഡ്മാസ്​റ്റർമാർ ഉള്ളത്. കോട്ടയം കിംഗ്സിൽ തമിഴ്നാട്ടിൽ നിന്നുള്ള എം.ആർ.വെങ്കടേഷും, തൃശൂർ തണ്ടേഴ്സിൽ തമിഴ്നാട്ടിലെ തന്നെ ദീപൻ ചക്രവർത്തിയും വയനാട് വാരിയേഴ്സിൽ ഒറീസയിൽ നിന്നുള്ള സ്വയംസ് മിശ്രയും മത്സരിക്കും.