സഭയിൽ വി.മുരളീധരന്റെ പ്രസംഗം അനുവദിച്ചില്ല

തിരുവനന്തപുരം: നിയമസഭയിൽ ക്രമപ്രശ്നം ഉന്നയിക്കാനുള്ള ബി.ജെ.പി അംഗം വി.മുരളീധരന്റെ നീക്കം സ്പീക്കർ തിരുവഞ്ചൂർ രാധാകൃഷ്ണൻ അനുവദിച്ചില്ല. വാക്കൗട്ട് പ്രസംഗങ്ങൾ കഴിഞ്ഞയുടനാണ് മുരളീധരൻ ക്രമപ്രശ്നവുമായി എഴുന്നേറ്റത്. ചട്ടം-307 ചൂണ്ടിക്കാട്ടി കാര്യങ്ങൾ വിശദീകരിക്കാൻ മുരളീധരൻ ശ്രമിച്ചെങ്കിലും സ്പീക്കർ വഴങ്ങിയില്ല. ഏതെങ്കിലും പരാമർശങ്ങൾ നീക്കം ചെയ്യാനോ തിരുത്തിക്കാനോ ഉള്ളതാണ് ഈ ചട്ടമെന്നും വാക്കൗട്ട് പ്രസംഗത്തിൽ ഇതിന് പ്രസക്തിയില്ലെന്നും സ്പീക്കർ റൂളിംഗ് നൽകി. മുരളീധരൻ വീണ്ടും വായിച്ചു തുടങ്ങിയപ്പോൾ താൻ ചട്ടം പരിശോധിച്ചെന്നും നടപടിക്രമങ്ങൾ അനാവശ്യമായി നീട്ടിക്കൊണ്ടു പോകാനാവില്ലെന്നും ചെയറിനോട് സഹകരിക്കണമെന്നും സ്പീക്കർ പറഞ്ഞു.