അമ്പലത്തി​ൽ ബഹളമുണ്ടാക്കി​യ വൃദ്ധയെ മകൻ അടി​ച്ചുകൊന്നു

കായംകുളം : ക്ഷേത്രത്തി​ൽ എത്തി​ ബഹളം വച്ചതി​ന്റെ പേരി​ൽ മകന്റെ മർദ്ദനമേറ്റ് വീട്ടമ്മ മരി​ച്ചു. പുതുപ്പള്ളി മഹിളമുക്ക് പണിക്കശ്ശേരിൽ പരേതനായ തങ്കപ്പന്റെ ഭാര്യ ശാന്തമ്മയാണ് (71) മരി​ച്ചത്. സംഭവത്തി​ൽ ശാന്തമ്മയുടെ ഇളയ മകൻ ബ്രഹ്മദേവനെ (43) കായംകുളം പൊലീസ് അറസ്റ്റ് ചെയ്തു.

ഞായറാഴ്ച രാത്രി​യി​ലാണ് ശാന്തമ്മ വീടിനുള്ളിൽ മരിച്ച് കിടക്കുന്നതായി മകൻ പൊലീസിൽ അറി​യി​ച്ചത്. അസ്വാഭാവിക മരണത്തിന് കേസെടുത്ത പൊലീസ് മൃതദേഹം ആലപ്പുഴ മെഡിക്കൽ കോളേജ് ആശുപത്രിയിൽ പോസ്റ്റുമോർട്ടം നടത്തിയപ്പോഴാണ് വാരിയെല്ല് പൊട്ടി ആന്തരിക രക്തസ്രാവം ഉണ്ടായതാണ് മരണകാരണമെന്ന് വ്യക്തമായത്. തുടർന്ന് നടത്തി​യ ചോദ്യം ചെയ്യലിൽ ബ്രഹ്മദേവൻ കുറ്റം സമ്മതിച്ചു.

മദ്യപിക്കുന്ന ശീലമുള്ള ശാന്തമ്മ മദ്യപാനം നിറുത്തുന്നതിനുള്ള ചികിത്സയിലായിരുന്നെന്ന് പൊലീസ് പറഞ്ഞു. ശനി​യാഴ്ച രാത്രി സമീപമുള്ള ക്ഷേത്രത്തിലെത്തി​ ശാന്തമ്മ ബഹളം വച്ചിരുന്നു. ബ്രഹ്മദേവനെത്തി​​യാണ് വീട്ടിലേക്ക് കൂട്ടിക്കൊണ്ട് പോയത്. ഇതേച്ചൊല്ലി ഇരുവരും തമ്മി​ൽ വാക്കുതർക്കം ഉണ്ടാകുകയും മകൻ മർദ്ദിക്കുകയുമായി​രുന്നു. ഭർത്താവ് മരിച്ചതിനു ശേഷം അവിവാഹിതനായ ബ്രഹ്മദേവനൊപ്പമായിരുന്നു ശാന്തമ്മ കഴിഞ്ഞു വന്നിരുന്നത്.

ഹരി​,മായ,ജ്യോതി​ എന്നി​വരാണ് മറ്റ് മക്കൾ. മൃതദേഹം വീട്ടുവളപ്പിൽ സംസ്കരിച്ചു.