മദ്യപിച്ചുണ്ടായ അടിപിടിയിൽ യുവാവിന്റെ മരണം: അയൽവാസി റിമാൻഡിൽ

ആലത്തൂർ: മദ്യപിച്ചുണ്ടായ തർക്കത്തിനൊടുവിൽ യുവാവ് പരിക്കേറ്റ് മരിച്ച സംഭവത്തിൽ കസ്റ്റഡിയിലായിരുന്ന അയൽവാസിയുടെ അറസ്റ്റ് രേഖപ്പെടുത്തി. ചിറ്റിലഞ്ചേരി പാഴിയോട് നൗഫലിനെയാണ് (നൗഷാദ് 32) ആലത്തൂർ പോലീസ് അറസ്റ്റു ചെയ്തത്. പാഴിയോട് സ്വദേശി രതീഷ്(39) ആണ് മരിച്ചത്. ബുധനാഴ്ച വൈകീട്ട് നാലുമണിയോടെ പാഴിയോട് നൂൽ നൂൽപ്പ് കേന്ദ്രത്തിനു സമീപമാണ് സംഭവം. തർക്കത്തിനൊടുവിൽ നൗഷാദ് രതീഷിന്റെ തല മതിലിൽ കൊണ്ടിടിച്ചും, കല്ല്‌കൊണ്ട് തലയ്ക്ക് ഇടിച്ചും പരിക്കേൽപ്പിച്ചെന്നാണ് കേസ്. തലയിൽ നിന്ന് രക്തം വാർന്ന നിലയിൽ കണ്ട രതീഷിനെ ആലത്തൂർ താലൂക്കാശുപത്രിയിൽ എത്തിച്ചുവെങ്കിലും മരിച്ചു. സംഭവ ദിവസം കസ്റ്റഡിയിലെടുത്ത നൗഫലിനെ ചോദ്യം ചെയ്തതിൽ നിന്നാണ് കല്ല് കൊണ്ട് തലക്കടിച്ചുവെന്ന് മൊഴി നൽകിയത്. ഇന്നലെ രാവിലെ ഡോഗ് സ്‌ക്വാഡും ഫോറൻസിക് വിഭാഗവും സ്ഥലത്തെത്തി തെളിവെടുപ്പ് നടത്തി. മണം പിടിച്ച പോലീസ് നായ തൊട്ടടുത്ത റബ്ബർ തോട്ടത്തിലെ വെള്ളക്കുഴിയിൽ വന്നു നിന്നു. തുട‌ർന്ന് വെള്ളക്കുഴിയിൽ നിന്ന് കല്ല് കണ്ടെടുക്കുകയായിരുന്നു. പ്രതിയെ ആലത്തൂർ ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു. രതീഷിന്റെ മൃതദേഹം പാലക്കാട് ജില്ലാ ആശുപത്രിയിൽ പോസ്റ്റ്‌മോർട്ടത്തിനുശേഷം വൈകീട്ടോടെ വീട്ടിലെത്തിച്ചു പൊതുദർശനത്തിനുശേഷം മേലാർകോട് പൊതുശ്മശാനത്തിൽ സംസ്‌കരിച്ചു.