സ്പെഷൽ ഡ്രൈവിൽ 60 ലിറ്റർ വാഷ് പിടിച്ചു

കൂത്താട്ടുകുളം:ലോക്സഭാ തിരഞ്ഞെടുപ്പിനോടനുബന്ധിച്ചുള്ള സ്പെഷ്യൽ ഡ്രൈവ് പരിശോധനയുടെ ഭാഗമായി നടത്തിയ റെയ്ഡിൽ ഇലഞ്ഞി മുത്തോലപുരത്ത് വീട്ടിൽ ചാരായം വാറ്റുന്നതിനായി 60 ലിറ്റർ വാഷ് പിടികൂടി. കേസിൽ മുത്തോലപുരം മച്ചുകുഴിയിൽ വീട്ടിൽ അനിൽ ശിവദാസനെ എക്‌സൈസ് അറസ്റ്റ് ചെയ്തു. പിറവം റേഞ്ച് ഇൻസ്പെക്ടർ സി.എച്ച്. ഹരികുമാറിന്റെ നേതൃത്വത്തിലായിരുന്നു പരിശോധന. പ്രതിയെ റിമാൻഡ് ചെയ്തു. അസിസ്റ്റന്റ് എക്സൈസ് ഇൻസ്പെക്ടർ ജോണി അഗസ്റ്റിൻ, പ്രിവന്റിവ് ഓഫീസർമാരായ ബിജു എം.വി., ജയദേവൻ എ. കെ. , സിവിൽ എക്സൈസ് ഓഫീസർമാരായ മിഥുൻലാൽ ടി.എം., ജിനൻ എം. കെ., വനിത സിവിൽ എക്സൈസ് ഓഫീസർ രമ്യ വി. എ. എന്നിവർ പരിശോധനയിൽ പങ്കെടുത്തു.