ആശമാർക്ക് ഉയർന്ന വേതനം കേരളത്തിൽ: എൻ.എച്ച്.എം

തിരുവനന്തപുരം: ആശാ വർക്കർമാർക്ക് രാജ്യത്ത് ഉയർന്ന ഓണറേറിയം ലഭിക്കുന്നത് കേരളത്തിൽ മാത്രമാണെന്ന് ദേശീയ ആരോഗ്യ ദൗത്യം (എൻ.എച്ച്.എം) അധികൃതർ അറിയിച്ചു. ആരോഗ്യ സേവനങ്ങൾക്കുള്ള ഇൻസെന്റീവാണ് ഓരോ മാസവും നൽകുന്നത്. 7,000 രൂപയാണ് ഓണറേറിയം. ടെലിഫോൺ അലവൻസ് ഉൾപ്പെടെ 13,200 രൂപ ലഭിക്കുന്നു.

2016ന് മുമ്പ് ഓണറേറിയം 1,000 രൂപയായിരുന്നു. ഘട്ടംഘട്ടമായാണ് 7000 രൂപയിലെത്തിയത്.

2023- 24 സാമ്പത്തിക വർഷത്തിൽ കേന്ദ്ര വിഹിതം ലഭിക്കാതിരുന്നിട്ടും എല്ലാ മാസവും കൃത്യമായി ഇൻസെന്റീവുകൾ സംസ്ഥാന വിഹിതം ഉപയോഗിച്ച് വിതരണം ചെയ്തു. ബാക്കിയുള്ള രണ്ടു മാസത്തെ ഓണറേറിയം നൽകാനുള്ള ഉത്തരവിറങ്ങിയിട്ടുണ്ട്. അത് എത്രയും വേഗം നൽകുമെന്നും അറിയിച്ചു.