'പറഞ്ഞവാക്ക് പാലിക്കണം'; ടേം വ്യവസ്ഥ അംഗീകരിക്കില്ലെന്ന നിലപാടിൽ മാണി സി കാപ്പൻ
തിരുവനന്തപുരം: മന്ത്രിസഭയിലെ ടേം വ്യവസ്ഥയില് പരസ്യമായി അതൃപ്തി അറിയിച്ച് മാണി സി കാപ്പൻ. അഞ്ച് വര്ഷം തന്നെ മന്ത്രി സ്ഥാനം വേണമെന്നതില് ഉറച്ച് നില്ക്കുകയാണ് പാലാ നിയുക്ത എംഎല്എ മാണി സി കാപ്പന്.
'വി ഡി സതീശന് ഇക്കാര്യം പാലായില് എത്തി പ്രസംഗിച്ചിരുന്നു. അങ്ങോട്ടുപോകുന്ന കാറില് ആയിരിക്കില്ല കാപ്പന് തിരികെ വരിക. കൊടിവെച്ച കാറിലായിരിക്കും മടങ്ങുകയെന്നാണ് പറഞ്ഞത്. രമേശ് ചെന്നിത്തലയും സമാനമായി കണ്വെന്ഷനില് പ്രസംഗിച്ചിരുന്നു. പറഞ്ഞ വാക്ക് പാലിക്കണം'- എന്നും മാണി സി കാപ്പന് പ്രതികരിച്ചു. ടീം യുഡിഎഫ് എന്നല്ലേ പറയുന്നത്. താനും അതിന്റെ ഭാഗമല്ലേയെന്നും മാണി സി കാപ്പന് ചോദിച്ചു.
അതേസമയം, ടേം വ്യവസ്ഥയില് അനൂപ് ജേക്കബും ഉടക്കി നില്ക്കുകയാണ്. മാണി സി കാപ്പനും അനൂപ് ജേക്കബിനും ടേം വ്യവസ്ഥയില് മന്ത്രിസ്ഥാനം നല്കാമെന്നാണ് കോണ്ഗ്രസ് വാഗ്ദാനം ചെയ്തിരിക്കുന്നത്. ഇത് സ്വീകാര്യമല്ലെന്നാണ് ഇരുവരുടെയും പക്ഷം. സിഎംപിക്ക് ഫുള് ടേം നല്കുന്നതിലും ഇരുവര്ക്കും എതിര്പ്പുണ്ട്. ഒറ്റ എംഎല്എമാരുള്ള കക്ഷികള്ക്ക് തുല്ല്യനീതി വേണമെന്ന ആവശ്യമാണ് ഇവര് മുന്നോട്ടുവെക്കുന്നത്. ഇക്കാര്യം ഇരുവരും കോണ്ഗ്രസ് നേതൃത്വത്തെ അറിയിച്ചിട്ടുണ്ട്