എല്ലാ ജില്ലകളിലും യൂണിറ്റി മാർച്ച്

ആലപ്പുഴ: യുവജനകാര്യ കായിക മന്ത്രാലയത്തിന്റെ കീഴിലുള്ള മേരാ യുവ ഭാരതിന്റെ നേതൃത്വത്തിൽ സർദാർ വല്ലഭായ് പട്ടേലിന്റെ 150-ാം ജന്മവാർഷികാഘോഷത്തിന്റെ ഭാഗമായി 31 മുതൽ നവംബർ 16വരെ രാജ്യത്തെ എല്ലാ ജില്ലകളിലും യൂണിറ്റി മാർച്ച് സംഘടിപ്പിക്കും. ഏക ഭാരതം ശ്രേഷ്ടഭാരതം എന്ന സന്ദേശം യുവാക്കളിലേക്ക് എത്തിക്കുകയാണ്​ ലക്ഷ്യം. ഇതിന്റെ ഡിജിറ്റൽ ഘട്ടമായി റീൽ മത്സരം, ഉപന്യാസ രചന, ക്വിസ് മത്സരം എന്നിവ സംഘടിപ്പിക്കും. മൈഭാരത് പോർട്ടലിലൂടെയാണ് രജിസ്ട്രേഷൻ. വാർത്താസമ്മേളനത്തിൽ ഡെപ്യൂട്ടി ഡയറക്ടർ വിവേക് ശശിധരൻ, ജില്ല നോഡൽ ഓഫിസർ ഡോ. എസ്.ലക്ഷ്മി, വോളണ്ടി​യർമാരായ എസ്. ശിവമോഹൻ, പ്രജിത്ത് പുത്തൻവീട്ടിൽ എന്നിവർ പങ്കെടുത്തു.