വർഷം 68 കഴിഞ്ഞിട്ടും മങ്ങാതെ കാളപ്പെട്ടി ചുവരെഴുത്ത്

കൊച്ചി: ഓരോ തിരഞ്ഞെടുപ്പ് കാലത്തും ആദ്യ തിരഞ്ഞെടുപ്പിന്റെ ഓർമ്മകൾ കൊച്ചിക്കാർക്ക് സമ്മാനിക്കുന്ന,​ കാലത്തിനും മായ്ക്കാൻ കഴിയാത്ത ചുവരെഴുത്ത് പരസ്യമുണ്ട് ഇടപ്പള്ളി മാർക്കറ്റിലെ ഇടപ്പള്ളി പള്ളിയുടെ ഉടമസ്ഥതയിലുള്ള പഴയ കെട്ടിടത്തിന്റെ ചുവരിൽ. 1957ൽ കോൺഗ്രസ് സ്ഥാനാർത്ഥികളായി നിയമസഭയിലേക്കു മത്സരിച്ച എ.വി. ജോസഫിനും ലോക്‌സഭയിലേക്കു മത്സരിച്ച എ.എം. തോമസിനും വേണ്ടി കോൺഗ്രസ് പ്രവർത്തകർ എഴുതിയതാണ് ഈ ചുവരെഴുത്ത്. മരത്തിന്റെ ഇലകളും ഇഷ്ടികപ്പൊടിയും ചാലിച്ചുണ്ടാക്കിയ നിറക്കൂട്ടു കൊണ്ടുള്ളതാണ് ഈ ചുവരെഴുത്ത്. അക്കാലത്ത് യൂത്ത് കോൺഗ്രസ് ഓഫീസായിരുന്നു ഈ കെട്ടിടം.

അന്ന് കുന്നത്തുനാട് നിയോജക മണ്ഡലമായിരുന്നു ഈ പ്രദേശം. കോൺഗ്രസിന്റെ ആദ്യത്തെ തിരഞ്ഞെടുപ്പു ചിഹ്നമായിരുന്നു കാളപ്പെട്ടി. ആ തിരഞ്ഞെടുപ്പിൽ ലോക്‌സഭയിലേക്കു രണ്ടാംവട്ടവും എ.എം. തോമസ് വിജയിക്കുകയും നിയമസഭയിലേക്കു മത്സരിച്ച എ.വി. ജോസഫ് പരാജയപ്പെടുകയും ചെയ്തിരുന്നു. എ.വി. ജോസഫ് 1948ൽ കുന്നത്തുനാട് നിയോജക മണ്ഡലത്തെ പ്രതിനിധീകരിച്ചു തിരുവിതാംകൂർ-കൊച്ചി നിയമസഭയിൽ അംഗമായിരുന്നു.