ഇന്ന് രാത്രി വനിതകളുടെ നടത്തം

വൈപ്പിൻ: വൈപ്പിൻ ഗോശ്രീ പാലങ്ങളിലൂടെ ഹൈക്കോടതി ജംഗ്ഷൻ വരെ എത്തുന്ന ബസുകൾക്ക് നഗരത്തിൽ പ്രവേശനം അനുവദിക്കണമെന്നാവശ്യപ്പെട്ട് വൈപ്പിൻ കരയിലെ വനിതകൾ നയിക്കുന്ന രാത്രി നടത്തം ഇന്ന്. വൈകിട്ട് 7.30ന് ഹൈക്കോടതി ജംഗ്ഷനിൽ നിന്ന് മേനക വരെയാണ് നടത്തം. വൈപ്പിനിലെ റസിഡൻസ് അസോസിയേഷനുകളുടെ കേന്ദ്ര സംഘടനയായ ഫ്രാഗ് ആണ് പരിപാടി സംഘടിപ്പിക്കുന്നത്. സംസ്ഥാന ചലച്ചിത്ര അവാർഡ് ജേതാവായ നടി പൗളി വത്സൻ ഉൾപ്പെടെ 300 വനിതകളാണ് പങ്കെടുക്കുന്നത്. വകുപ്പ് മന്ത്രി അനുകൂല സമീപനം എടുത്തിട്ട് പോലും കൊച്ചി നഗരത്തിലെ ട്രാൻസ്പോർട്ട്, പൊലീസ് അധികൃതരുടെ എതിർപ്പാണ് നഗരപ്രവേശനം നിഷേധിക്കുന്നതിന് പിന്നിൽ.