ഓട്ടോറിക്ഷ തിവെച്ച് നശിപ്പിച്ചു

തളിപ്പറമ്പ്: ധർമ്മശാല തളിയിൽ എ.കെ.ജി വായനശാലക്ക് സമീപം താമസിക്കുന്ന കോക്കാടൻ എം.കെ.ഗണേഷിന്റെ സ്വകാര്യ ഓട്ടോറിക്ഷ തീവച്ച് നശിപ്പിച്ചു.തിങ്കളാഴ്ച രാത്രി 11.45 ഓടെയാണ് അ‌ജ്ഞാതർ ഓട്ടോ അഗ്നിക്കിരയാക്കിയത്. വീടിന് സമീപത്ത് സ്വന്തമായി ഗ്രിൽസ് വർക്ക്‌ഷോപ്പ് നടത്തുകയാണ് ഗണേഷ്. തിങ്കളാഴ്ച വൈകുന്നേരം അഞ്ചുമണിയോടെ പതിവുപോലെ ഓട്ടോറിക്ഷ വീട്ടുമുറ്റത്ത് നിർത്തിയിട്ടതായിരുന്നു. രാത്രി 11 മണിയോടെ ഗേറ്റ് അടച്ച് വീട്ടുകാർ ഉറങ്ങിയിരുന്നു. വീടിന് പുറത്ത് വെളിച്ചം കാണപ്പെട്ടതിനെത്തുടർന്ന് ഉണർന്ന് നോക്കുമ്പോഴേക്കും ഓട്ടോ പൂർണമായും കത്തിനശിച്ചിരുന്നു. പെട്രോൾ ഒഴിച്ച് തീ കൊടുത്തതാണെന്ന് കരുതുന്നു. വീടിന്റെ ഗേറ്റ് തുറന്നിട്ട നിലയിലാണ്. വിവരമറിഞ്ഞ് പൊലീസ് സ്ഥലത്തെത്തി പരിശോധന നടത്തി.